نيرة الأحمر تهاجم أحمد بلال بسبب تصريحاته على الزمالك: إيه مشكلتك؟، هو انت اللي دافع فلوس البعثة؟

رد نادي الزمالك على تصريحات أحمد بلال لاعب النادي الأهلي السابق، التي أثارت الجدل على منصات التواصل الاجتماعي خلال الأيام القليلة الماضية.

قالت نيرة الأحمر عضو مجلس إدارة نادي الزمالك في تصريحات عبر شاشة قناة «الزمالك»: «لا عزاء ولا تركيز ولا أي حاجة للتصريحات اللي بتدور على التريند، مقدرش أقول نجم سابق بصراحة مش هقدر أقولها، انت مش نجم وببساطة النجم بيقول الحق».

وأضافت: «النجم مش شوية مهارات وأجوان وبس، النجم اللي عنده ثقافة وعارف بيقول إيه وبيقول تصريحات سليمة، ويكون قدوة، مش طالع يقول الزمالك ميروحش السعودية، إيه مشكلتك؟، هو انت اللي دافع فلوس البعثة؟».

وتابعت: «انت مالك خليك في فريقك، انت بتتكلم عن الزمالك بالشكل ده، ده كيان انت مين بجد؟، محتاج تفوق وتكون قدوة، البعد عن الأضواء مؤلم وصعب، وبتدور نطلع تريند إزاي، عشان محدش شايفنا، فنتكلم عن الزمالك، بس فلت منك».

وأكملت: «الزمالك هيكسب يوم الجمعة وده حقي تمامًا، وتقول وجهة نظرك بس مش أكتر، وعندنا لاعيبة رجالة وبتموت نفسها، انت مالك، متشغلش بالك انت».

وواصلت: «انت لا تمثل النادي الأهلي، واللي زيك ممكن يعمل شحن، إحنا بنلعب برا ولازم روح رياضية زي ما بنعمل هنا في الزمالك، ليه بقى التصرفات الفردية دي».

وأتمت: «فين قصتك يعني، حاجة غريبة وكلام مريب للبحث عن التريند، إحنا كسينا الكونفدرالية وفي دعم عشان نكسب يوم الجمعة، وكفاية إشاعات على الزمالك بقى، بس مش هنتأثر برضو، وانت في الآخر مش موجود وهتختفي تاني، وشوف شغل مفيد عن كدة».

تصريحات أحمد بلال

قال أحمد بلال في تصريحات عبر قناة «النهار»: «مباراة السوبر الأفريقي أعتقد أنها ستنتهي قبل بدايتها لصالح النادي الأهلي، في ظل مستوى الزمالك المتواضع للغاية».

وأضاف أحمد بلال: «الزمالك بمستواه الحالي أعتقد أنه لن يسدد كرة على العارضة حتى بالمباراة، ولو دا المستوى اللي هيلعب بيه المباراة، مش هيكون محتاج يسافر للسعودية حتى لا يخسر بنتيجة ضخمة، ونسبة فوز الأهلي 90%».