بلبن تدافع عن منتجها «لهاليبو يح يح»: مطعم تاني عنده سندوتش الفياجرا

دافعت شركة بلبن عن اسم منتجاتها الغربية، منها اسم منتج لهاليبو يح يح، لافتة إلى أنه أحد المطاعم لديه منتج باسم سندوتش الفياجرا. 

بيان بلبن عن منتج لهاليبو يح يح

وقال مطعم بلبن في بيان عبر صفحته الخاصة على فيس بوك: بخصوص موضوع لهاليبو يح يح.. والله كنا هنكتب بيان بخصوص موضوع الأسامي اللي منتشر بقالة يومين وبغض النظر بقي هي حملة ممنهجة ولا صدفه حبينا نقول كلمتين بالبلدي ومن القلب ومن غير بيانات ورسميات.

وأضاف: أولًا الحمد لله رب العالمين على النعمة الكبيرة اللي إحنا فيها وتوفيق ربنا الكبير لينا في كل الدول العربية اللي فتحنا فيها واللي كنا وجهة مشرفة فيها وبنفخر إننا براند مصري 100٪.

اختيار الأسامي..تهريج 

وتابع: ثانيًا إحنا محل حلويات يا جماعة يعني الموضوع في الحقيقة بسيط جدًا بس عشان النجاح والفروع الكتير فتلاقي الكلام عننا كتير الحمد لله، لكن لما تلاقي مطعم عنده فرع ولا اتنين مسمي سندوتش الفياجرا ده اللي عادي خالص طبعًا ومفيهوش إفساد للذوق العام وحضرتك بتروح تطلبه عادي.

وواصل: ثالثًا الأسامي عندنا من باب التهريج البحت ومعظمها بيكون صدف مرتبطة بحاجات حصلت أثناء التجارب.. من وجهة نظرنا اللي ممكن متكونش مقنعة بالنسبالك فمثلًا فكرة اسم المنتج اللي عليه الضجة كان هيتسمي لهاليبو بس في الأول علي أساس إن العجين سخن من بره وده مش العادي في الآيس كريم بعد كده اتضاف كلمة يح يح على أساس إنه ساقع من جوه.. وفعلا الموضوع بالنسبالنا كان تهريج تمامًا مش مقصود بيه أي حاجة كنا شايفينة اسم مضحك إفيه زي قوليلي يا محاميحو كده الموضوع بسيط وتافه واتجاه كوميدي.

واستكمل: رابعًا بجد كل اللي بيحصل وبنشوفه في التلفزيون وعالنت وأسامي منتجاتنا هي اللي بتفسد الذوق العام.. أسامي منتجاتنا عاملة أزمة أخلاقية لدرجة إنك بتدعو لمقاطعة مكان نأكل عيش ليه أكتر من 70 فرع في مصر وبيشتغل في أرباب أكتر من 20 ألف أسرة.

وأوضح: كان ممكن تكتفي علي فكرة إنك متطلبش المنتج بس لأن في حاجات أخلاقية كتير قوي محتاجين نتكلم فيها أهم من اسم منتج أيس كريم في السوق مش علي هواك.. لكن تطالب بمقاطعة مكان أكل عيش الناس دي كلها.. والله حاسس إن الموضوع مش منطقي حبتين تلاتة.

واستكمل: خامسًا إحنا اسفين لأي حد شايفنا غلطانين وحاسس إن إحنا فعلًا اللي عاملين أزمة بسبب اسم لهاليبو.. ومن النهاردة قررنا تغيير اسم المنتج خالص لأي اسم يرضي الجميع ويكون في الصالح العام وممكن نلغي المنتج خالص عادي.

واختتم: أخيرًا إحنا بنتقي ربنا في أكل عيشنا والحمد لله قصة نجاح مصرية في 8 دول عربية بأكثر من 180 فرع وأكتر من 40 ألف مصري شغال في المجموعة دي سواء داخل مصر أو في الخارج وعندنا أخطاء تشغيلية ومشاكل شغالين على حلها وبنسمع لكل النقد وبنحاول نحل كل المشاكل، والحمد لله مستوانا في تحسن مستمر في كل حاجة وبنشتغل على كل أخطائنا وبنتعلم منها ومش بنكابر وعشان كده الحمد لله ربنا بيكرمنا.. ولسا قدامنا كتير وعندنا خطة تطوير وتحسين لكل حاجة وبنشكر ربنا ومن بعده كل الناس اللي بتساندنا وكل اللي بينتقدنا نقد بناء بيساعدنا إننا نكون أحسن.