5 ساعات ونص كيلو بن وسط محوج.. أكرم حسني يكشف كواليس كتابة "تيجي نسيب" لـ أنغام

كشف الفنان أكرم حسني لأول مرة تفاصيل مثيرة حول كواليس كتابة أغنية "تيجي نسيب" التي غنتها المطربة أنغام، وذلك من خلال منشور طريف على حسابه على فيسبوك. 

تضمن المنشور قصة مضحكة تروي كيف جاءت فكرة الأغنية وكيف تعاون مع الملحن إيهاب عبد الواحد لإتمامها.

بداية الفكرة: ليلة طويلة وإلهام الفجر

شارك أكرم مقطعًا للملحن إيهاب عبد الواحد وهو يعزف على الجيتار ويسجل لحن الأغنية على هاتفه المحمول. وعلّق قائلاً:" الساعة اربعة الفجر : قام ايهاب عبد الواحد عشان يمشي بعد سهرة طويلة عندي في البيت ايهاب مسابش فيها الجيتار من ايده هو بيغني و كلنا بنغني معاه".

وأضاف "بعد ما كله مشي جاتلي فكرة أغنية " تيجي نسيب " ف كتبتها و خلصتها علي الساعة ستة الصبح ، و هموت و اكلم ايهاب عشان يجيلي يسمعها و يلحنها بس مكسوف اكلمه .. الراجل لسه ماشي من عندي من ساعتين و اكيد ملحقش ينام. الساعة سبعة صباحا بعد ما قدرت امسك نفسي لمدة ساعة كاملة اتصلت بيه ف رد بصوت غرقان في النوم".

ودار الحوار بين أكرم وإيهاب كالآتي:

أكرم : صباح الفل يا بوب .. صحيت ؟ ( سؤال فيه كمية استهبال مش طبيعية )
ايهاب : لا لسه .. انا نايم من ساعتين بس .. في حاجة ؟
أكرم : لا يا حبيبي مفيش .. خلاص اصحي و كلمني
الساعة سبعة و ربع اتصلت تاني

أكرم : ايه يا بوب صحيت ؟
ايهاب ( بعصبية مكتومة قدرت احسها ) : اكرم انت كويس ؟
أكرم : اه يا معلم تمام بس اصلي كتبت حاجة كده و حاسس انها حلوة ف عايز اسمعهالك
ايهاب ( بحماس ) : لا ان كان كده هفوق و البس و اجيلك
أكرم : يالا مستنيك

الساعة سبعة ونص اتصلت بيه

أكرم : بوب قهوتك ايه ؟
ايهاب ( بعصبية ) : اكرم .. و الله العظيم بفوق و هاجي
أكرم : ماشي يا حبيبي مستنيك

الساعة تسعة ايهاب وصل

أكرم : بوب انا كتبت اغنية فرحان بيها اوي
ايهاب : طب مش كنت بتسألني قهوتي ايه ؟
أكرم ( بتجاهل ) : بص يا بوب الاغنية بتقول " تيجي نسيب .. تيجي نجيبها في النصيب .. تيجي نقول محناش لبعض و يبقي بعد تغيب و اغيب ............ "
ايهاب ( باندهاش ) : مين اللي كاتب الكلام ده ؟
أكرم : انا
ايهاب ( بنفس حالة الاندهاش ) : انا قهوتي سادة
أكرم : حالا

أكرم حسني يكشف كواليس كتابة "تيجي نسيب"

وتابع أكرم: "من الساعة تسعة للساعة اتناشر ايهاب مبيعملش حاجة غير انه ماسك الجيتار و عمال يجرب جمل لحنية في دماغه و يطلب قهوة سادة. الساعة اتناشر و عشر دقايق كان خلص اللحن و بيسجله ( بصوا الساعة اللي ورا عشان تتأكدوا ) و مكانش يعرف اني لما قولتله و هو ماشي الفجر عايزين نكررها قريب انها هتبقي قريب أوي كده".

وأكمل القصة: "الاغنية راحت للموزع الكبير صاحب اللمسات السحرية حسن الشافعي عشان يحط بصمته عليها و تطلع بالشكل اللي انتوا سمعتوه. اغنية تيجي نسيب اتكتبت و اتلحنت في خمس ساعات و استهلكت نص كيلو بن وسط محوج ، بس عشان طالعة من القلب و لحنها ملحن عبقري بيحس بكل كلمة و يترجمها ل لحن ربنا كرمنا بأن اللي يغنيها تبقي فنانة معجونة احساس و فن و حلاوة صوت و حضور طاغي و مكانة كبيرة في قلوب جمهورها في كل حتة في الوطن العربي .. انغام".