«عمره ما قفل الباب في وش حد».. أحمد الشيخ ينعي إيهاب جلال بكلمات مؤثرة

تحدث أحمد الشيخ، لاعب الفريق الأول لكرة القدم بالنادي الإسماعيلي، عن علاقته بالراحل إيهاب جلال، مدرب الإسماعيلي، ومنتخب مصر السابق.

وكتب الشيخ عبر حسابه على «فيسبوك»: «أنا حياتى اتغيرت بعد فضل ربنا ثم فضل الراجل ده، علمنى كتير أوى وحققت معاه حاجات كنت بحلم بيها من صغرى، كم الخير اللى بيعملوا أنا شوفته النهاردة من حب ودعاء الناس له».

وأضاف: «مشيت وسبتنى ليه، سبتنى ليه يابوب، مش قادر أصدق إنى مش هشوفك تانى كنت نعم الأب والمدرب اديتنى كتير أوى وفضلك عليا بعد ربنا كبير وكان نفسى أردلك جزء من حقك، إلى جنات النعيم يا أبويا».وتابع: «يارب ارحمه واغفرله يارب اجعل مرضه شفيعا له يارب انت عالم بكل شىء وعالم إنه كان أطيب حد في الدنيا دى مافيش حد هييجى زيه عمره ما تأخر على حد في مساعدة قدام عينى كنت أقوله وأحسده في الخير ما شاء الله يا بوب انت بتساعد الناس كلها وعمرك ما قفلت باب في وش حد كان يقولى يابنى الحاجات دى هي اللى باقية وكله تجارة مع الله».

وأوضح: «آخر فترة كان متأثرا جدا بسبب اللى حصله مع المنتخب وكم الضغوطات اللى اتحط فيها لكن هو قوى جدا وكان يتحمل المسؤولية عمره ما طلع قال مبررات أو جاب الغلط على لعيبة كنت أقوله ليه حضرتك ماخدتش حقك على الأقل المادى من المنتخب».

أتم: «ليه حضرتك ماتطلعش ترد وتعرف الناس اللى حصل، وليه حضرتك ماتردش على الناس اللى بتسيء ليك؟ يقولى يابنى دى كلها صراعات ودنيا أنا مش عايز منها حاجة أنا عايز الآخرة لما ربنا يفتكرنى عايز الناس كلها تدعيلى، بالله عليكم لا تنسوه في الدعاء».