أقوى مواجهة بين جنة عليوة وشهد سعيد على الهواء.. تنتهى بالاعتزال

رفضت جنة عليوة لاعبة الدراجات، اعتذار شهد سعيد لها، قائلة: "أنا مش فارق معايا تروح الأولمبياد أو متروحش، روحي اتفسحي، ويصعب عليا نفسي بعدما تعمدت إيذائي إني أقبل اعتذارها دلوقتي".

وتابعت خلال لقائها ببرنامج "على مسئوليتي" المذاع على قناة "صدى البلد": "إزاي أقبل اعتذارها دلوقتي وهي وأسرتها مسألوش عليا بعد خضوعي لعملية جراحية بسبب إيذائها ليا".

وأضافت: "بعد لما الموضوع بقى رأي عام، شهد سعيد عايزة تعتذر وأهلها بدأوا يظهروا، علشان تسافر وتشارك في أولمبياد باريس 2024، أنا أرفض اعتذارها وعايزة حقي، ومش فارق معايا تروح ولا متروحش".

من جانبها، ردت شهد سعيد لاعبة الدراجات وبطلة الواقعة: "أنا مش متعمدة إيذاء جنة عليوة، أنا هلعب عجل تاني طالما هما مش عايزني أمثل مصر، ومش عايزة أروح الأولمبياد".

وتابعت باكية: "استجابة لطلبات الناس أنا باعتذر عن المشاركة في أولمبياد باريس، وأنا لو جوايا إني كنت متعمدة هقول.. بس أنا لم أخطئ للدرجة اللي اتعرضت فيها للهجوم الكبير ده، أنا لم أقصد الإيذاء، أنا بقالي 4 سنين محصلش الهجوم ده عليا كدة".

وأكملت: "أنا اعتذرت لجنة وهي اللي رفضت وقمت لها علشان أبوس على دماغها، وهي اللي رفضت، والمأمور قال لأمها: إنتي هتدخلي بنت عندها 19 سنة مع المجرمين والحرامية واللي بيقتلوا قالت له: ما هي شبههم".