ابن ينعي والدته المتوفية بالحج بكلمات مؤثرة: فراقك كسر ضهري ياما .. ربنا عوضك عن كل أذي شوفتيه في الدنيا

تخيّم حالة من الحزن الشديد على أهالي مركز إهناسيا بمحافظة بني سويف، لفقدانهم المعلمة "هناء حلمي" التي وافتها المنية أثناء أدائها فريضة الحج في الأراضي المقدسة.

وحرّر ابنها "محمد السيوفي" رسالة مؤثرة عبر صفحته على فيسبوك، رثى فيها والدته بكلمات تقطّع القلوب، عبّر من خلالها عن مدى حبه وتعلقه بها، ووصف مشاعره الحزينة لفراقها.

 الابن يودّع أمه

"أنا عارف ياما إنك مبسوطة دلوقتي ومش حزينة، إنتي عارفة اني كنت بحبك اوي ومكنش حد مهون عليا حياتي غيرك، كنت عايش عشانك يا أمي، كنت بنزل عشانك إنتي، النهارده نزلوني وإنتي مش موجوده في البيت"

"أنا قاعد ياما مكان ما كنت بنام جنبك يا نور عيني، مكنتش بترضي تنامي في شقتك وأنا موجود عشان تقعدي معايا، طب أنا ياما هعيش وحداني كده خلاص، مفيش حد هيرن يطمن عليا تاني ولا يسال حي ولا لا، يا أمي وحتي لو حد سأل مش هيكون مهم بنسبالي بعدك يا فقيدة حياتي وعمري وقلبي قطعتي بيا أوي ياما"

"فراقك كسر ضهري ياما، ده أنا عندي 25 سنه وكنتي سايبالي العيدية وإنتي مسافرة، طول عمرك وإنتي بتيجي علي نفسك عشان تراضيني، أنا مبسوطلك اوي والله ربنا عوضك عن كل أذي شوفتيه في الدنيا، بس فراقك صعب أوي عليا وكسرني يا أمي، والله ملحقتش حتي ارضيك في الدنيا"

أمنيات لم تكتمل

عبّر "السيوفي" عن حزنه الشديد لعدم قدرته على اصطحاب والدته معه في رحلة الحج، كما كانا يتمنيان، فقال:

"كان نفسك أطلع أنا معاكي الحج، وكنت بقولك هنروح مع بعض بعد تلت سنين ولا أربعة، أنا طفل فاقد أمه في السوق ومش عارف يرجع بيته، كل حاجه بقت غريبة يا أمي بعدك ولا عاد للدنيا أي لازمة في غيابك".

تضرّع "السيوفي" إلى الله بالرحمة والمغفرة لوالدته، ودعا كلّ من يقرأ رسالته أن يدعو لها بالرحمة، فقال:

"رحمك الله وأسكنك فسيح جناته يام قلب طيب ياحنينة، ربنا عوضك يا أمي علي تعبك وصبرك معانا، الله يرحمك يارب، الرجاء الدعاء لها بالرحمة والمغفرة"