إسماعيل فرغلي: أتمني تقديم عمل فني عن يوم القيامة.. أفضل من مليون خطبة جمعة

حل الفنان إسماعيل فرغلي، ضيف في برنامج «عيش صباحك»، يكشف عن تفاصيل أعماله الفنية التي يتمني يقدمها خلال الفترة المقبلة.

وقال إسماعيل فرغلي:«اتمني تقديم عمل فني عن يوم القيامة، وسألت مستشار في الأزهر، هل في مشكلة إننا نعمل فيلم اسمه يوم القيامة؟، لأننا عايشين في مجتمع مفيهوش أخلاقيات الأخ بيأكل مال ولاد أخوه الأيتام والابن بيعصي أبوه وأمه، والإعلام يطلع يقول إن القيامة هتقوم كمان أسبوع، فى ناس تروح المدينة أو الكعبة علشان تموت فيها، ويكتشفوا إن مفيش يوم قيام بعد فترة».

وأضاف إسماعيل فرغلي:«رد عليا المستشار قالي دي أحسن من مليون خطبة جمعة، واستدل بآية قرآنية بما معانا، لو ده هيحسن حال الناس لا بأس».

في سياق آخر، تحدث إسماعيل عن علاقته بزوجته،قال: «مراتي دي بقالي معاها 26 سنة، ويعني مش لاقي حاجة تساهل أقول عليها إيه، كتر خيرها وبقول للناس تدعيلها ربنا يشفيها لأن دي الرزق اللي بجد».

واستكمل إسماعيل فرغلي حديثه، قائلًا:«أنا ربنا مدنيش فلوس بس إداني اللي أحسن من الفلوس؛ لأن ممكن يكون معاك مليارات ومتعرفش تعيش، أنا بجنيه بعيش بألف بعيش مفيش بردو بعيش، وهي عمرها ما طلبت الطلاق مرة بس قالتلي كلمة وجعتني أوي قالتلي أنا قلبي وجعني من قلة الفلوس».

يذكر أن إسماعيل فرغلي شارك في السباق الرمضاني لهذا العام 2024، بمسلسل «خالد نور ووالده نور خالد»، بطولة الثنائي الفنان شيكو، الفنان كريم محمود عبد العزيز، ويشارك فيه مجموعة كبيرة من الفنانين، أبرزهم: آية سماحة، دنيا ماهر، شريف رمزي، من تأليف أحمد عبدالوهاب، كريم سامي، وإخراج محمد أمين.