«أحسن فرقة في العالم».. ملخص حديث لاعبي الزمالك في غرفة ملابس لقاء النهائي

كشف الحساب الرسمي للاتحاد الإفريقي لكرة القدم كاف، عن ما قاله لاعبو الزمالك والجهاز الفني قبل مباراة نهضة بركان في إياب نهائي كأس الكونفدرالية الإفريقية، وما قالوه بين شوطي اللقاء عندما كانت النتيجة تقدم الفارس الأبيض بهدف دون رد.

قبل بداية المباراة

كان عمر جابر يقول لزملائه: ننزل كلنا الملعب مع بعض يا جماعة.

في حين أعطى جوميز بعض التعليمات للاعبيه قبل بداية المباراة وألقى عليهم المحاضرة الأخيرة، وترجم له أحمد مجدي، حيث قال جوميز لـ لاعبي الزمالك: التحدي بتاعنا النهاردة هو الزمالك ضد نهضة بركان يا رجالة، ودا الشوط التاني من الماتش؛ احنا خسرانين اتنين واحد.

وأضاف جوميز قبل بداية مباراة الزمالك ونهضة بركان في إياب نهائي الكونفدرالية داخل غرفة خلع الملابس: انت داخل التحدي دا بشكل فردي، ولو كسبت التحدي اللي بينك وبينه هناخد الكأس، ولازم تكسب التحدي اللي بينك وبينه من أول دقيقة.. من أول دقيقة يا رجالة.

كلام الونش لـ لاعبي الزمالك قبل بداية مباراة نهضة بركان المغربي في نهائي الكونفدرالية

في حين، ألقى محمود حمدي الونش بعض الكلمات الحماسية تجاه زملاؤه، دعمًا لهم، وبعض التعليمات الذي استخدم فيها خبرته، حيث قال: الأجواء تسخّن ومش عاوزين السخونية تديهم اللي هما عايزينه، وميبقاش الراجل ضهره للملعب واعمل فاولات حول الـ 18 ملهاش أي لازمة.

وأشار: الأجواء تسخّن بس أنا ببقى عارف أنا بعمل ايه؛ محدش هيسمع حد فكل واحد شايف اللي جنبه وعارف هو واقف فين وشايف الراجل بتاع الفرقة التانية عشان هما هيبقوا ناقصين قدام، فلا تسرح مع الكورة وتسيب الراجل الناحية التانية أو في ضهري فاضي.

وأكد الونش على لاعبي الزمالك: محدش هيسمع حد لأي تعليمات لازم الـ 11 لاعب اللي في الملعب يبقوا 11 لاعيب كبار وعارفين هما بيعملوا ايه.

واختتم الونش حديثه لـ لاعبي فريقه قبل بداية مباراة نهائي الكونفدرالية: بلاش السخونية تاخدنا ونديهم حاجات ساذجة ملهاش أي لازمة.. الماتش يبقى كويس والبداية كويسة إن شاء الله وهنخلص بدري بدري بأمر الله.

بعدها قرأ لاعبي الزمالك الفاتحة، وقال لهم عبد الواحد السيد مدير الكرة: بالله عليكم ما تروّحوا الناس دي كلها زعلانة.. نكسب يا رجالة.. كله هيكسب إن شاء الله.

بين شوطي المباراة

وعقب انتهاء الشوط الأول بتقدم الزمالك بهدف دون رد على حساب فريق نهضة بركان المغربي، بقدم اللاعب أحمد حمدي، أشاد جوميز بين شوطي اللقاء بلاعبي الزمالك وما فعلوه خلال شوط المباراة الأول.

ونقلت الكاميرات، حديث عمر جابر في البداية لـ لاعبي فريقه بين شوطي المباراة المثيرة، حيث قال لهم: ربنا كارمنا يا جماعة لحد ما جبنا الجون والله أحسن فرقة في العالم.

كلام جوميز لـ لاعبي الزمالك بين شوطي مباراة نهائي الكونفدرالية

في حين قال جوميز بدوره: أنا فخور أن أنا المدرب بتاعكم؛ عشان الماتش بدأ وانتوا بدأتوا تكسبوا كل التحديات.. النتيجة 1-0 وانتم تستحقوها وانتوا عملتوا الجول واشتغلتوا عشان تجيبوا الجول.

وعن ما الذي هو مطلوب من لاعبي الزمالك في الشوط الثاني، قال جوميز: نفس الحاجة دي مطلوبة منكم الشوط التاني نبدأ بنفس الحاجة ونفس الخطة أكنها 0-0، وهنحارب لحد ما نكسب الماتش دا والماتش معانا يا رجالة.

وأتم جوميز حديثه لـ لاعبي الزمالك قبل الدخول إلى أرضية ستاد القاهرة لبدأ الشوط الثاني: كل كورة في الماتش هي أهم كورة.

وأثناء كلام جوميز، كان محمد عواد يقول لـ لاعبي فريقه وزملاؤه: 45 دقيقة يا جماعة بالموسم بتاعنا كله.