ميدو: شيكابالا مش هيبطل كورة.. والزمالك أعظم قلعة رياضية في مصر

صرح الكابتن أحمد حسام ميدو عبر برنامجه ( الريمونتادا) بقناة المحور 

وقال ميدو :" الزمالك للمرة المليون بيثبت إنه نادي عظيم في ظل كل الظروف الصعبة , والزمالك يحصل على بطولة قارية مهمة في توقيت صعب جدا , وجمهور الزمالك كان عظمة خلال مشوار الفريق في البطولة , وعلى الرغم من إرتفاع درجات الحرارة ألا أن الناس من الساعة 2 و 3 الضهر قدام الإستاد وجوه الإستاد مستننين معشوقهم الأول وده بدون مقابل رايحين يشجعوا ناديهم ويدعموه والجمهور ده وفي عمره ما إدى ضهره لناديه مهما حصل , والزمالك داخل في 115 سنة والبنزين بتاعه جمهوره , وجمهور الزمالك بيشجع النادي علشان يسكب مش علشان بيكسب , والنهاردة جوزيه جوميز إتعلم من أخطائه"

وأضاف ميدو :"بقالكم 10 سنين بتحاولوا تبطلوا شيكابالا الكورة النهاردة هو أكثر لاعب في نادي الزمالك حصولا على البطولات وشيكابالا مش هيبطل كورة إلا لما هو يقول"

وتغزل ميدو في أداء المدافع التونسي حمزة المثلوثي قائلا :" كل ما أشوف المثلوثي النهاردة أفتكر الكابتن مدحت عبدالهادي"

  وتابع ميدو :" أي نادي في الدنيا لو إتعرضله نفس اللي بيتعرض ليه نادي الزمالك كان إنهار ووقع ومكملش ولكن علشان الزمالك نادي عظيم ووراه جمهور عظيم لسه مكمل"

وشكر ميدو فخامة الرئيس عبدالفتاح السيسي بعد تهنئته للفارس الأبيض عقب تتويج نادي الزمالك بالكونفيدرالية الأفريقية قائلا :" شكرا ياريس"

وإختتم ميدو حديثه قائلا :" بتمنى الأهلي يفوز بدوري أبطال أفريقيا أمام الترجي علشان يبقى السوبر الأفريقي مصري والأهلي قادر يعملها إن شاء الله"