عمرو أديب يتوعد أوبر: أنا مش هسكت ومش هنسيبها على حل شعرها

علق الإعلامي عمرو أديب، على الجدل المثار بشأن شركات النقل الذكي في مصر، بسبب تكرار حالات التجاوزات من السائقين.

وطالب أديب خلال برنامج «الحكاية» المعروض عبر فضائية «إم بي سي مصر»، مساء الجمعة، بوجود وقفة تجاه تطبيقات النقل الذكي في مصر من أجل منع الحوادث التي انتشرت مؤخرًا.

في ناس كتير طلعت وقالت إنها تعرضت لخطر

وأضاف: «بعد الحوادث الأخيرة، فوجئنا أن في ناس كتير طلعت وقالت إنها تعرضت لخطر بسبب شركات النقل الذكي، بعد حادثة أوبر الأخيرة الناس كلها بتقول وأنا كمان اتحرشوا بيا وأنا كمان حصل كذا وأنا عملولي كذا ليه حضراتكم كنتم ساكتين؟!».

وأوضح: «في ناس بتشغل من الباطن في أوبر، ابنك ولا بنتك يركبوا من هنا والرحلة تتلغي، وانت تقعد تقولي يا حلالي يا بلالي الواد فين؟ البنت فين؟ إنتوا عايزين تكملوا كده، كملوا إنتوا، أنا مش راجع، أنا مكمل في الموضوع ده لوحدي، غير لما أشوف الناس واخدة حقها، فيه ناس ماتت».

وتابع: «السواقين المحترمين على دماغي، لكن أنا مش هسكت، ومش هسيب موضوع أوبر، واللي زيها، وهفضل وراه لآخره، هما ياخدوا حقهم وإحنا ناخد حقنا».

ونفى دعوته إلى إغلاق هذه الشركات موضحًا: «مين قالكم عايزين نقفلها، هو يا نقفلها يا نسيبها على حل شعرها… هو مفيش وسط ونعمل وقفة مع هذه التطبيقات، إحنا بنركب عربيات الشركات دي وبندفع فلوس».

وأكمل: «إحنا بندفع فلوس عشان ناخد أمن وأمان وراحة لو مفيش يبقى متشكرين. في بريطانيا بيشدوهم شدة يعرفوا أن الله حق».

وأشار «أديب» إلى أن شركات النقل الذكي تتعامل بحالة من التجاهل ولم تتخذ أي إجراءات تجاه الحوادث الأخيرة، متسائلًا: «ما الجهة المسؤولة عن تطبيقات النقل الذكي؟».