أخويا كان سبب في موت أبويا وتشويه سمعتي بيكسرني.. غادة عبد الرازق تفتح صندوق أسرارها مع لميس الحديدي

حلت الفنانة غادة عبد الرازق ضيفة على الإعلامية لميس الحديدي، في برنامج كلمة أخيرة، لتكشف عن أسرار تبوح بها لأول مرة. 

قالت الفنانة غادة عبد الرازق: "ما عنديش استقرار نفسي وبتعامل كست مريضة من 35 سنة ومعنديش استقرار عاطفي، التمثيل يؤدي إلى الشهرة والماديات والنجاح بس الطريق ده قصاده خد مني حاجات كتير بشوفها عند ناس وبحسدهم عليها زي الاستقرار والبيت والزوج والأطفال وكل حاجة".

غادة عبد الرازق تعترف بخطأها مع ابنتها روتانا

وتابعت: "أنا حاسة إني دمرت ناس حواليَّ زي بنتي روتانا اللي انفصلت من زوج ومعاها ولاد ويمكن أن أكون سبب ده، واتحمل مسؤولية ده لإن كل راع مسؤول عن رعيته، وبالتالي أنا مسؤولة عن بنتي، روتانا من ساعة ما اتولدت لحد دلوقتِ مرتبطة بيَّ وممكن أكون أنا عامل من العوامل اللي بوظت لها حياتها وفشل جوازها".

قالت الفنانة غادة عبد الرازق: "أنا بحب أخبي كسرتي وأختفي، مش بحب حد يشمت فيَّ وأنا عمومًا ست بيتوتية ومختفية طول الوقت بس في لحظة الانكسار بختفى أكتر".

الأمور التي تكسر غادة عبد الرازق

وأضافت خلال لقائها ببرنامج "كلمة أخيرة" الذي تقدمه الإعلامية لميس الحديدي بقناة "أون": "اللي يكسرني فشل في الشغل أو محاربة أعداء ليَّ ووصولهم لغرض ما أو حاجة تمس بنتي أو أهلي، أو حاجة تشوه سمعتي والخيانة بتكسرني والأزمة المادية تكسرني".

وتابعت غادة عبد الرازق: "أنا زيي زي بقية البني آدمين بتعرض لأزمات مادية لأن التزامات كبيرة أوي وربنا بيدي لكل بني آدم على قد التزاماته، ولما أفشل في العمل يؤثر عليَّ وعلى التزاماتي".

ندم غادة عبد الرازق على دخول التمثيل

وواصلت: "لما كبرت بقيت أكثر ذكاءً وأقل عندًا، وبقيت باخد وقتي قبل أي قرار باخده، عقلي بيغلب المشاعر دلوقتِ، وما بقاش عندي خلق للمحاربة وبقيت اهتم بحياتي الشخصية وبنتي روتانا وأحفادي وعملي، ما بقتش أفكر ولا أخطط في تصفية الحسابات".

قالت الفنانة غادة عبد الرازق: "طول الوقت كنت بحاول أثبت لأهلي إني قوية، كان عندي أخ صغير توفى اسمه خليل وهو ولد واحد وكان مميز جدا عننا علشان هو الولد وكان سبب في موت أبويا".

وفاة شقيق ووالد غادة عبد الرازق 

وأضافت غادة عبد الرازق خلال لقائها ببرنامج "كلمة أخيرة" الذي تقدمه الإعلامية لميس الحديدي بقناة "أون": "أبويا كان بيترافع في قضية الوفد بمجلس الدولة قبلها بيومين أخويا خليل عمل حادثة وخبط حد بالعربية والولد اللي اتخبط كان في المستشفي وخليل مكنش عايز يقول لأبويا الولد فين، فاللي أنا افتكرته كانت فيه خناقة وبابا كان داخل علي خليل أوضته يضربه وبيقول له قوللي الولد فين وبعدين الحمد لله طلع ان الولد مكنش مات، بس بابا خلال جلسة الوفد جاله هبوط في الدورة الدموية ووقع بالمحكمة وجاله جلطة ومات وانا وقتها كان عندي 12 سنة ومن وقتها كنت باثبت إني أقدر أقيم هذه الأسرة".

وتابعت غادة عبد الرازق: "خليل أخويا اتوفى وأنا عندي 15 سنة وبابا توفى وأنا عندي 12 سنة وبالتالي فضلت انا وماما ويسرية وبدأت اشتغل وعمري 21 سنة من بوابة الإعلانات ومكنش التمثيل في الخطة".