«أزاي مشجع بدون علم وطبلة».. شوبير ينتقد منع جماهير الأهلي من ارتداء الرقم 72

انتقد أحمد شوبير، حارس مرمى الأهلي ومنتخب مصر السابق، المضايقات القوية التي يتعرض لها جمهور النادي الأهلي في الفترة الأخيرة ومنعهم من دخول المباريات بالأعلام وأدوات التشجيع، وكذلك منعهم من ارتداء الرقم 72 الخاص بشهداء الأهلي.

أنا كمشجع أخش إزاي من غير علم وإزاي من غير الطبلة

وقال أحمد شوبير، في تصريحات إذاعية اليوم الاثنين: «أنت النهاردة بتقول لي 20 ألف متفرج لمباراة الأهلي والزمالك والاستاد هيفتح الساعة 3 والماتش أساسا الساعة 7، ليه كل ده؟، ده هما 10 آلاف مشجع هنا و10 آلاف هنا، أنا من حقي أروح قبل المباراة ب5 دقائق ألاقي مكاني موجود».

وتابع أحمد شوبير: «ولازم تعمل موضوع الأكل والماء جوه الاستاد بسعر مناسب ويكون سعر التذكرة مناسب خاصة في المباريات العادية وارفعها شوية في ماتش زي الأهلي والزمالك».

وأوضح شوبير: «أنا كمشجع أخش إزاي من غير علم وإزاي من غير الطبلة الكبيرة اللي بتبقى مع واحد أو اثنين وإيه المشكلة أروح أغني وأزمر وأنبسط.. الجمهور يا جماعة مش على هوا حد الجمهور على هوا اللي يحبه وزمان الجمهور كان بيخترع لنا أغاني وإحنا في المدرجات».

أنت في دولة فيها نظام واحترام

وأضاف شوبير: «وليه المشجع ما يلبسش الرقم 72 إزاي يعني ده لاعبي الأهلي بيتدربوا ويسخنوا بالرقم 72، كده كده ممنوع منعا باتا الخلط بين الرياضة والسياسة المدرج عشان المتعة والفرحة والسعادة لكن في نفس الوقت مش شايف مشكلة في لبس تي شيرت بأي رقم، والممنوعات اللي ممنوعة أنت ملتزم بيها تماما».

واختتم شوبير: «أنت في دولة فيها نظام واحترام لابد أن يطبق على الجميع، بس في نفس الوقت إديني راحتي وأنا بشجع، وفي نفس الوقت أنت كمشجع بلاش تطاول ولا ألفاظ كانوا زمان بيقولوا مانجا مانجا رجل الخطيب كمنجة، سبني أفرح بفرقتي ألبس فانلتي أرفع علمي أضرب على طبلتي طالما لم أتجاوز».