عبد الناصر زيدان لـ"داليا المتبولي": إكتشفت من خلال الرنين المغناطيسي إنه كسر كبير ويستوجب 6 شهور تعليق دراعي

حل الإعلامي الرياضي عبد الناصر زيدان ضيفًا على بودكاست "Restart" مع الإعلامية داليا المتبولي وكشف عن تفاصيل إصابته بالكسر في ذراعه أثناء إستضافته في برنامج "رامز جاب من الآخر" وعن تطورات حالته ولجوءه إلى القانون.

وأضاف: "إكتشفت من خلال الرنين المغناطيسي إنه كسر كبير ويستوجب 6 شهور تعليق دراعي وعملية ممكن تكون خارج مصر".

وتابع: "آخر أشعة عملتها من أسبوع وبدأ إلتئام العظام، ولكن هفضل معلق دراعي لمدة 3 شهور، وهعمل أشعة كل 10 أيام، والجرح مضايقني على المستويين الشخصي والإنساني".

وأوضح: "تطورات حالتي الصحية خلتهم عايزين يرضوني بأي طريقة، تاني يوم إدوني 35000 درهم على أساس إن الأمور بسيطة ولكن الوضع صعب".

واستكمل: "في دبي في مكتب قانوني اتفقنا معاه وهنرفع قضية، ولأول مرة بقول أنا والفنانة سمية عبد الخشاب متضامنين وإتفقنا على كده هيكون في قضية في دبي وفي مصر هيكون مكتب المستشار مرتضى منصور وأنا كنت قاعد معاه وإتفقنا وظبطنا كل حاجة وهما دلوقتي بيدرسوا الأمور وإن شاء الله هيكون في بيان من المستشار مرتضى منصور".

وتابع: "وأنا اللي كلمت مرتضى منصور وكلف المحامي أستاذ محب صلاح من مكتبه تواصل معايا وأنا بشكر جدًا الأستاذ محب صلاح على الشهامة والرجولة اللي شايفها منه وهو إبن أخت مرتضى منصور"، موضحًا: "والقضايا في دبي ومصر وأنا طالب مليون دولار".

وأضاف: "أنا سكت وتصالحت من أول دقيقة والأستاذ أبو المعاطي لما فاق قال ده آخر واحد أجي معاه، والأستاذ أبو المعاطي طول عمره راجل عاطفي وحساس".