أنا قد كلامي عشان راجل.. بيومي فؤاد يقدم اعتذارين ويعاتب محمد سلام بعد أزمته الأخيرة

حل الفنان بيومي فؤاد ضيفًا على برنامج "حبر سري" تقديم أسما إبراهيم ويعرض على قناة "القاهرة والناس".

وتطرق "بيومي" للعديد من الموضوعات منها أزمته الأخيرة في "موسم الرياض"، وعن مشاريعه خلال الفترة الماضية، كما قام بالرد على مهاجميه منهم المخرجة كاملة أبو ذكري، وعلاقته بنجوم الوسط الفني، إلى جانب عودته بمسلسل "الكبير أوي 8" في دراما رمضان هذا العام.

وتحدث الفنان بيومي فؤاد عن أزمته مع الفنان محمد سلام ودافع عن الفنان محمد أنور الذي جاء بديلًا لـ "سلام"، وكشف عن العديد من التفاصيل لأول مرة في فقرة بعنوان "قد الكلام".

رد على هجوم كاملة أبو ذكري

ورد الفنان بيومي فؤاد على هجوم المخرجة كاملة أبو ذكري عقب أزمته قائلا: "كل واحد في حاله ولم يحصل عتاب ولا كلام وفي حاجات مينفعش فيها كلام وده رأيها وهي قررت ومكتبتليش ليه اللي عملته ولكن هي قالت رأيها وقررت، وكان في بينا كلام وهي مخرجة كبيرة والواحد يتمنى يشتغل معاها وفي مسلسل سجن النسا بعتت لي وعرضت عليا 3 أدوار وساعتها كان عندي مسلسلات كتير فرحت لها واعتذرت وتقبلت الاعتذار".

دراما رمضان 2024

وعن عدم مشاركته بأي أعمال درامية في رمضان هذا العام سوى الموسم الثامن من مسلسل "الكبير أوي" قال: "لم أشارك غير في الكبير أوي لأني ماضي حصري وترشحت في 6 أعمال ومقدرش أقولهم عشان تبقى قلة أدب ولما أقول أسم الأعمال ممكن الممثل يزعل، وبقيت حريص أوي وبقيت أخاف أزعل حد ومضيت للكبير أوي وفضلته لأني أساسي فيه وتحت أمره وصاحب فضل عليا ومقدرش أتراجع عن الكبير قوي واخترت مكنش موجود كتير عشان في ناس زعلانة وأنا بتحدي بالكبير الموسم ده وتعبنا فيه جدًا ويقال أنه هيبقى مسك الختام".

اعتذارين

وتحدث عن تصريحه المثير للجدل "احنا مش بتوع فلوس": "لأ احنا بنروح السعودية عشان نشتغل وناخد فلوس، وربنا يكفيكوا شر أن كوميديان يقول افيه ومايجبش، شوفتوا الأستاذ الكبير فؤاد المهندس لما الأستاذ الكبير مفيد فوزي في الكواليس حب يسأله في حاجة وهو داخل اتنرفز عليه ازاي، وده في آخر أيامه كمان الأستاذ الكبير فؤاد المهندس فأحنا نطلع ايه كم التوتر وضربات القلب السريعة وبطننا اللي بتوجعنا واحنا داخلين ده بفلوس طبعًا.. ولكل الناس المحترمة اللي في يوم من الأيام حبوا بيومي فؤاد وقدروا فنه وموهبته وزعلانين مني.. أنا أعتذر لهم وأقول لهم :"انتوا فوق دماغي.. الفنان من غير جمهور ولا حاجة".

بكاء بسبب صورة محمد سلام

وأجهش الفنان بيومي فؤاد في البكاء فور رؤيته صورة الفنان محمد سلام بأحد فقرات البرنامج وعلق عليها: "ربنا معاك، ازاي ماتطلعش تدافع عننا، ازاي ماتطلعش تدافع عن محمد أنور وهو ترشيحك وحقك عند ربنا أنا صدقتك جدًا وانت قولت في الفيديو بتاعك لا نفاق ولا رياء وانا وجهة نظري العبيطة عشان أنا راجل طيب ماكنتش هتخسر حاجة لو طلعت قولت أنا مقدرتش ومش معنى أنور قدر وراح يحصل معاه كده يا جماعة خصوصًا أنك طلعت تدافع عن أمير كرارة لما طلعت إشاعة بتقول أن أمير مشاك من المسلسل بتاعه وانت ماكنتش معاه في المسلسل طلعت دافعت، طلعت دافعت عن أحمد الجنايني لما طلعت إشاعة واتشم بأهله طلعت دافعت ليه مطلعتش تدافع عن أنور مش عني".

دفاع عن محمد أنور

كما دافع عن الفنان محمد أنور الذي جاء بديلًا للفنان محمد سلام بمسرحية "زواج اصطناعي" قائلا: "كلنا اتشتمنا لما روحنا والحملة كانت شرسة على محمد أنور عشان هو كان البديل، وكان من الحاجات اللي فاكرها واللي اتقال عليها أن الحياة بتتعاش مرة واحدة يا تعيشها سلام يا تعيشها أنور، وأنور كان بيبكي وكنا بننزل نفطر ونتغدى ونتعشى وأنور مش معانا".

عتاب لمحمد السبكي

وعاتب الفنان بيومي فؤاد المنتج محمد السبكي بسبب فيلم "مطرح مطروح" قائلا: "ليه عملت كده يا محمد؟، أنا عمري ما قولت على فيلم انه بتاعي، فيلم "مطرح مطروح" الوحيد اللي قولت عليه انه بتاعي عشان أتولد في مكتبي أتألف في مكتبي مش اللي اتعرض ده خالص ومحمد السبكي لما راح له الفيلم قال أقسم بالله ما هغير كلمة من كتر إعجابه وهو راجل بيفهم في السوق وفي الورق ، اللي حصل أن الفيلم ده يكفي أقولك أن الأستاذ شريف عرفة قالي هات أعملهولك لما سمع مني السطر وفضلت محمد السبكي لأن السبكي قالي أنا مش شغال".

أزمته مع محمد سلام

وواصل حديثه عن أزمته مع الفنان محمد سلام وقال: "هو نزل صور مسلسل الكبير بعد فيديو الاعتذار عن المسرحية والتزم بعقوده ووعوده في الكبير، وجالي تليفون من محمد نصار منتج المسرحية قالي الحق سلام اعتذر وكانت طيارتنا 10 صباحًا وكلمني 3 فجرًا ومسألتوش ليه، وليه هو كلمني أنا؟، وليه أي حد في الدنيا لما بتحصله مشكلة مع سلام بيكلموني أنا؟، عشان انا كبير سلام واسألوه، وروحت رفعت التليفون أول رنة رد سلام قالي عم يوكا والله العظيم أنت أول واحد كنت عايز أكلمه بس قولت زمانك نايم، قلت له لأ يا حبيبي أنا بحضر الشنط عشان خايف الطيارة تفوتني وبجهز".

رسالة لرواد السوشيال ميديا

وعن الهجوم عليه من قبل رواد السوشيال ميديا قال: "أنا مش طالع انهاردة أرد على اللي شتمني، عشان بالتحري يعني أخويا محامي وكان ماسك القضية اكتشفنا أن ولاد عندهم 17 و20 و23 سنة أولادنا يعني وأنا عندي 59 سنة، فلما يبقى حد 17 سنة يسمح أنه يشتمني بأمي وبأبويا فالعيب مش عليه العيب على اللي رباه لا أكتر ولا أقل، أنا طالع انهاردة اتكلم للناس اللي بيحبوا بيومي فؤاد وزعلانين منه انتوا فوق دماغي".

جنسية دولة الدومينيكان

إلى جانب حديثه عن حصوله على جنسية دولة الدومينيكان وتفكيره في الهجرة بسبب أزمته قال: "أهاجر!، ده انا مبستحملش 10 أيام بره مصر، واتقالي ان الباسبور ده هيدخلك 36 دولة بدون تأشيرات فعملتها أنا وأسرتي ودي الحقيقة ولو في حاجة تانية قولي لي ألحق لأن لحد دلوقتي لسه مجاليش، وأنا سعيد بجنسيتي وليا الشرف أني مصري وهفضل لحد ما أموت مصري، ومش معايا أي جنسيات تانية غير مصر بس معايا إقامات".

فيلم الإسكندراني

وكشف الفنان بيومي فؤاد مفاجأة عن فيلم "الإسكندراني" وتحدث عن السبب وراء عدم تصدره بوستر الفيلم في مصر على الرغم من تصدره بالعديد من الدول العربية قال: "عمري ما طلبت أن أسمي وصورتي يسبقوا أي حد، ولا طلبت في مرة أسمي يتكتب فين ولا صورتي تتحط فين والحلقة دي أنا بقول لكل بني ادم لحد ما الحلقة تخلص أي حرف جر هيطلع من بقي كدب أرجوكم أطلعوا كدبوني عمري ما طلبت، أنا اتقالي وانا بقرا الفيلم ده وانا داخل أعمله انت الإسكندراني".