رانيا يوسف تهاجم محمد سلام: هتقول لربنا ايه على رقصك وهزارك في مسلسل الكبير أوي

هاجمت الفنانة رانيا يوسف الفنان محمد سلام بعد ظهوره في الجزء الثامن من مسلسل الكبير أوي الذي يعرض في الماراثون الرمضاني الحالي وهو في أجواء من الرفاهية والمرح مع أبطال العمل خلال إحدى الحلقات، بعد أن كان يرفض الكوميديا في أعماله الفنية خلال الفترة الأخيرة مراعاة لأحداث غزة.

وكتبت رانيا يوسف عبر حسابها الشخصي بموقع التواصل الاجتماعي فيسبوك:"بتفرج على الكبير أوي لقيت الزميل محمد سلام بيرقص ويهزر عايزه اسأله يعني عملت مشكلة وجدل عشان متروحش مسرحية ترقص وتهزر فيها وروحت تعمل كده في مسلسل وأنت بتعمل كده مفكرتش في أهلنا في فلسطين وهتقول ايه لما تقف قدام ربنا".

أزمة بيومي فؤاد ومحمد سلام

وكان قد علق الفنان بيومي فؤاد، لأول مرة على تصريحاته التي أثارت الجدل بموسم الرياض بعد أزمة محمد سلام، قائلا: "مش ندمان على كلامي وأنا قد كلامي عشان راجل واعتذر فقط عن حاجة واحدة أني قلت مش جاي اضحك وأنا جاي اضحك والضحك شيء جميل والكوميديا شيء صعب".

وأضاف بيومي فؤاد، خلال حواره ببرنامج "حبر سري"، مع الاعلامية اسما ابراهيم، على قناة القاهرة والناس، أنهم يطلقون عليه في الخارج عمدة المصريين ويستشعر مسئولية، مضيفا: "لما بطلع بمسرحية بحس أني رئيس بعثة ومسئول عن الناس بتوعنا ولكنا اشتمنا لما رحنا والحملة كانت شرسة على محمد أنور لأنه كان البديل ومكنتش بشوف الحاجات اللى على السوشيال ميديا ومحمد أنور كان بيبكي".

وتابع: "كنا بننزل وقت الفطار والغداء والعشاء نتعشى وهو مش معانا وكنا بنسابق الزمن وأنور كان بيعمل البروفات والأغانى والاستعراضات وعملنا بروفات يزيد عن شهر واحنا سفراء لبلدنا بيحبونا ويحترمونا ويقدرونا لو ده كايدكم أو غايظكم لكن دي حقيقة وهما بيحبونا وده غايظ اللي بيشتمنا ويدعي علينا ادعاءات والمفروض انه مثقف"، مؤكدا أن محمد أنور كان مكتئب جدا.