بعد ما شرب معاه الشاي.. اعترافات المتهم بقتل صديقه بالمحلة الكبرى

نظرت  الدائرة الرابعة بمحكمة جنايات المحله الكبرى بمحافظة الغربية، قضية مقتل صياد علي يد صديقه بسبب خلافات على أماكن الصيد بعزبة «مشوبر» التابعة لقرية «البنوان» بدائرة مركز المحلة، وقررت تأجيل الجلسة للشهر المقبل للاستدعاء الطب الشرعي وتلبية متطلبات محامي الجاني.

اعترافات المتهم بقتل صديقه بالمحلة الكبرى

وقال المتهم في اعترافاته: «اللي حصل أن أنا بصطاد سمك انا ووليد وسامح ووليد انا معرفش اسمه بالكامل في الترعة اللي عند سامول ويوم الجمعة اللي فانا كنت قاعد انا ووليد وسامح علي الترعه وكنا بنتكلم علي الصياده وسامح كان بيتفق معايا أنه هياخد جزء من الترعة بيني وبين وليد عشان يصطاد فيه واتخانقنا بالكلام مع بعض علشان سامح عاوز ياخد جزء من الترعة عشان يصطاد فيها والجزء ده كان من حقي وهو خد جزء من وليد وأنا قولتلهم محدش هينصب شبك هنا واللي هينصب شبك هنا وانا هقطعه وركبت الموتوسيكل  بتاعي لونه اسمر ومشيت وروحت عند حته اسمها الملال ولما وصلت عند الملال لقيت سامح جه  وراي جري وراكب موتوسيكل وليد لونه أسمر  برضو ولقيته كان بيراضيني وبيقولي خلي وليد يديني حته من الترعة وانا وانت هنراضي بعض بعد كده فأنا قولتله مش هينفع وانا وسامح بنتكلم لقيت وليد كلم سامح علي التليفون بتاعه ولقيت وليد بيقول ل سامح لما تخلص مع أحمد تعالي لي علي القهوة وانا هشرب كوباية شاي علي بال ما تيجي وانا وسامح نهينا الكلام ساعتها مفيش حل وسامح مشي وراح لوليد علي القهوة بالموتوسيكل  اللي كان معاه وانا كلمت وليد علي تليفونه وقولتله انا مش هسيب حته من حقي حد يصطاد فيها وانا بكلم وليد سامح كان وصل له علي القهوة  وسامح خد التليفون من وليد وشديت أنا وسامح مع بعض وقفلنا التليفون علي الزعل ده وانا روحت البيت في دمتنو وقعدت في البيت من بعد العصر للمغرب وقومت اتشطفت ولبست وركبت التروسيكل وكنت رايح سامول علشان اجيب فردة كاوتش الموتوسيكل الصغير وطلبت سامح في التليفون قولتله انت فين قالي انا كنت بجيب حباية علاج من الصيدلية اللي ورا كوبري الميزانية فقولت له تعالي علشان نجيب الشبك من ترعة المشاريع فقالي ماشي واتقابلنا عند ترعة المستشفي بتاع سامول وركب معايا التروسيكل وروحنا علشان نلف علي الشبك في الترع وروحنا علي المشروع عند عزبة المشوبر عند المشروع ووقفنا هناك أنا وسامح واتكلمنا في موضوع الشبك والمسافة اللي هو عاوزها في الترعة وزعقنا مع بعض وقلت له مش هتاخد سنتي من مكاني خالص في الترعه وهو رد عليا وقالي انا هطلعلك انت ووليد من الترعة خالص واي حد هيجلي علي سكة هزعله  ولقيته قام مطلع مطوه بزرار  قام فتحها وقالي اللي هيقف في سكتي هنهيها وخبطني بالبوكس بايده اللي فيها المطوة».

تفاصيل الواقعة 

وكانت الأجهزة الأمنية بمديرية أمن الغربية، قد تلقت اخطارا من مأمور مركز شرطة المحلة الكبرى بالعثور على جثة شاب في الثلاثينات من العمر مذبوحا ملقى في مصرف ري سندسيس بجوار قرية البنوان التابعة لدائرة مركز المحلة الكبرى بعزبة المشوبر.

وعلى الفور، انتقلت الأجهزة الأمنية وشرطة النجدة وقوة من مباحث مركز المحلة الكبرى إلى موقع البلاغ، وتبين من خلال فحص الجثة أنها لشاب يدعى سامح أحمد يبلغ من العمر 30 سنة، ومقيم بقرية سامول التابعة لدائرة المركز، وسبق قيام أخيه بالتقدم ببلاغ بتغيبه عن المنزل منذ عدة أيام.

وبتوقيع الكشف الظاهري على الجثة، تبين وجود أثار جرح قطعي في الرقبة نتيجة استخدام سلاح أبيض، أودى بحياته في الحال، وتم نقل الجثة بواسطة الإسعاف إلى مستشفى المنشاوي العام بطنطا لتشريح الجثة بمعرفة الطب الشرعي وبيان سبب الوفاة، وحرر محضر بالواقعة وباشرت النيابة التحقيق وكلفت إدارة البحث الجنائي بسرعة التحريات حول ظروف وملابسات الواقعة.