مش هنطبطب .. إبراهيم حسن يوجّه رسائل نارية للاعبي منتخب مصر

وجّه إبراهيم حسن، مدير منتخب مصر، رسائل نارية إلى لاعبي منتخب مصر، بشأن الفترة المقبلة، بعد تعيين شقيقة حسام مديرا فنيا للفريق الوطني الأول.

رسائل نارية من إبراهيم حسن الي لاعبي منتخب مصر 

وقال إبراهيم حسن، في مداخلة هاتفية ببرنامج «can أبيدجان»، الذي يقدمه أحمد عبدالباسط، عبر فضائية «cbc»: «اللاعب الجاهز واللي قلبه ميت هو اللي هيبقى موجود معانا في المنتخب، اللاعب اللي مش جاهز مش هنجيبه على حساب البلد وعلى حساب لاعب بيجتهد حتى لو بيلعب في الدوري المصري».

وأضاف: «مش هيبقى متواجد في منتخب مصر إلا اللاعب اللي واقف على رجليه، مفيش مجال للدلع ومش هنطبطب على حد».

وتابع: «هنلعب بأي حد حتى لو لاعب صغير ولم يسبق له لعب أي مباراة دولية، اللاعب اللي هيبقى فاكر نفسه عمل حاجة ومش هيخلِص في الملعب لن يكون له دور معنا، إحنا بنحب اللاعب المخلص اللي بيموت نفسه عشان المكان اللي هو فيه وده مش أي مكان ده منتخب مصر».

وواصل: «اللاعب اللي موجود مع منتخب مصر لازم ياكل النجيلة ويبقى سعيد بوجوده في معسكر المنتخب»، مضيفًا: «هناك لاعبين لم يتم استغلالهم في بطولة أمم إفريقيا الأخيرة، نسعى للاستفادة منهم في الفترة المقبلة».

وأتمّ إبراهيم حسن، تصريحاته قائلًا: «أمامنا شغل كتير مع منتخب مصر وعايزين الكل يبقى إيد واحدة معانا، وننتظر الدعم والمساندة من الجميع».