محمد فراج يشيد بمنى زكي: بتحرك الحجر ومش هيجي زيها

أشاد الفنان محمد فراج، بالفنانة منى زكي، بعد مشاركتهما معا في فيلم "رحلة 404" وظهوره ضيف شرف، وذلك خلال مداخلة هاتفية مع برنامج "الحكاية" من تقديم عمرو أديب عبر قناة mbc مصر.

وقال محمد فراج : "مبروك لمنى زكي وهاني خليفة لأنهم والسيناريست محمد رجاء يستاهلوا كل خير، أنا فخور إني كنت في مركب زي دي وطلعت معاهم الرحلة الحلوة أوي دي استمتعت واتعلمت واستفدت أنا فخور إني في الفيلم ده".

محمد فراج: فخور إني جزء من "رحلة 404"

وتابع محمد فراج متحدثا عن نجاحه في الفيلم رغم ظهوره في مشهدين فقط قائلا: "أنا حاسس إني بنتمي لهذا الفيلم قلبا وقالبا، واتشرف إني جزء من هذا العمل ونجاحي دا بفضل ربنا وبفضل منى زكي لأنها تحرك الحجر وبستمتع بالشغل معاها".

وأضاف: "أول مرة أستاذ هاني اتكلم معايا مكنتش عارف هعمل إيه وإيه الدور لكن لما عرفت أن الفيلم لمنى زكي ومن إخراج هاني خليفة مفكرتش للحظة لأن أي ممثل بيدور على كده فيلم يتعلم ويستفاد منه".

وكشفت الفنانة منى زكي، كواليس فيلمها الجديد “رحلة 404”، الذي يعرض حاليا في دور عرض السينمات، وذلك خلال لقائها مع الإعلامي عمرو أديب ببرنامج الحكاية.

وأكدت الفنانة منى زكي، أن العديد من المنتجين رفضوا هذا الفيلم بسبب إنه غير جماهيري، معقبة: هاني خليفة جابلي الورق في 2011 وكل ما نقرر نعمله المنتجين كانوا بيقولوا ده مش فيلم جماهيري، ومش هيعجب الناس، فنعمل مشاريع تانية ونرجع تاني ندور على منتجين، وتقريبا لفينا على كل المنتجين، والرد كان إنه مش هيعجب الناس، وفي الآخر محمد حفظي هو اللي تحمس للفيلم عشان يطلع.

فيلم رحلة 404

وتابعت: الفيلم متصنف للكبار فقط ومكنتش متخيلة إنه هيتصنف +18 يعني قولت ممكن 16+،  ومن أول يوم وأنا حباه ومش شايفة إنه فيه حاجة وحشة، بالعكس حابة الفلسفة اللي وراه، وبعد ما صورنا شوية من الفيلم بدأت أفهم إزاي الناس ممكن تطلعك على المسرح فقلقت شوية.

وأضافت: بس أكتر حاجة طمنتني هو وجود أستاذ هاني خليفة، وعمرك ما هيجيلك إحساس إنك تقرف من شخصية غادة، ولازم نفهم إن إحنا مش ربنا، وكل البني أدمين بتغلط وليهم أخطاء حسب نسبة الخطأ.

أبطال فيلم رحلة 404

فيلم رحلة 404 بطولة منى زكي بالاشتراك مع مجموعة كبيرة من النجوم وضيوف الشرف، أبرزهم: محمد فراج، محمد ممدوح، شيرين رضا، خالد الصاوي ومحمد علاء مع حسن العدل، سما إبراهيم، شادي ألفونس، رنا رئيس، جيهان الشماشرجي وعارفة عبدالرسول، وهو من تأليف محمد رجاء وإخراج هاني خليفة.