تامر آمين مدافعا عن صلاح: انتوا عايزين إيه؟ .. مش هترتاحوا غير لما نحطمه؟

حرص الإعلامي تامر أمين، بالدفاع عن محمد صلاح، لاعب منتخب مصر ونادي ليفربول الإنجليزي، وذلك بسبب الانتقادات الكثيرة التي تعرض لها خلال الفترة الماضية.

وقال "أمين" خلال حلقة برنامجه "آخر النهار" المذاع عبر شاشة "النهار": "هو أنتوا عايزين إيه من صلاح؟ خلونا نفضفض كده، رد من قلبك، هتشتم عادي أنا بحب الشتيمة وبتقبلها... سبب سؤالي حالة الهجوم غير المبررة على نجمنا الأول في الرياضة، وفي كل مجالات الحياة".

تامر أمين يدافع عن محمد صلاح

وتابع: "كل ما يفتح بوقه يتهاجم، طب ميفتحش بوقه ويسكت يتهاجم، يعلق على الأحداث يتهاجم، أنا لو مكانه هقولكم أنتوا عايزين إيه طيب؟".

وأضاف: "الراجل منزل صورة من كتاب له علاقة بزرع الطموح والثقة بالنفس، هجوم وتحليلات ونظريات وحاجات أكبر بكتير من اللي صلاح يعنيه، كل الناس بتستقبل خواطر كل الناس عادي إلا محمد صلاح، خواطره لازم تتفسر وتتحرف عشان نهاجمه".

رسالة قاسية من تامر أمين لمهاجمي محمد صلاح 

واسترسل: "ليه بتعملوا كده؟ إيه الفكرة من تحطيم الناجحين، كل شعوب الأرض بتنجم نجومها وبتنفخ في رموزها حتى لو ميستاهلوش، إيه فرحتكم لو اسقطوا صلاح غير الخسارة؟".

واصل: "افتكر كام ألف مرة صلاح فرحنا وهو مع منتخب مصر، وهو بيلعب في الأندية الأوروبية، ماتشات ليفربول اللي مكنتش تعرف عنه حاجة أصبحت عاملة زي مبارايات المنتخب بنقعد نتجمع عشان نتفرج على نادي ودوري لا يعنينا".

واختتم: "مشجعي ليفربول بيلطموا عشان صلاح جاي يلعب كأس أمم إفريقيا، بيقولوا هنعمل إيه من غير صلاح شهر، صلاح سايب الدوري الإنجليزي وهو الهداف وأكتر واحد عامل كل حاجة، ده صلاح اللي مش عاجبكم ونازلين تكسير فيه كأنه عدوكم".