أحمد حسن كوكا يكشف تأثير حملات دعم غزة على الغرب: استوعبوا أنهم من غير رحمة

استنكر لاعب منتخب مصر أحمد حسن كوكا، جرائم الاحتلال الإسرائيلي، في تغريدة عبر حسابه على موقع التواصل الاجتماعي “إكس” تويتر سابقا.

تغريدة أحمد حسن كوكا

كتب كوكا: "بنصحى كل يوم نروح شغلنا مُجبرين عشان أهالينا وأولادنا اللي مسؤولين عنهم وقلوبنا فيها ألم ووجع على أحبابنا وأخواتنا في فلسطين، في كل ثانية بتمر خبر جديد أبشع من اللي قبله، بنتصور إن خلاص مفيش أوحش من كده ممكن يحصل، بس مابنستناش كتير ونلاقي اللي أبشع منه".

وأضاف: "أعتقد إن بعد ما قصفت إسرائيل المستشفى والمدرسة والكنيسة وكل شيء محرم، ضاربة بالقوانين الدولية عرض الحائط، بدأت بعض الناس تستوعب إن ليس لديهم قلب و لا رحمه، بدأت تتغير الأراء ، لإن بجد صعب جداً إن يقف شخص في صف كل الشيطانية دي".

وواصل:"أب بيشيل عياله أو أعضاء من عياله في كيس بلاستيك، أجسام من غير رؤوس، كل الوحشية دي ولسه مفيش حاجه توقفهم لحد اللحظة دي وبرغم قساوة كل اللي فات، ولسه كتير من المجتمع الغربي لا يستنكر أصلا اللي بيحصل، خلاص كلام بلغتهم مالوش لازمة عشان كل حاجه واضحة، ليه احنا كعرب مانتحدش؟، أنتم متخيلين قوة كل دولة عربية؟، أنتم متخيلين لو كل الدول العربية تصدوا لأي عدوان على أي دولة عربية".

واختتم:" ممكن تكون فيه أبعاد سياسية تانية أنا مش فاهمها، و ممكن كمان يكون تخيلي ده قاصر، لكن اللي أعرفه إن الاتحاد قوة، والقوي هو اللي بيتعمل له حساب".