الرياضة

تحدث عماد النحاس المدير الفني المؤقت للنادي الأهلي، عن تفاصيل المرحلة القادمة في قيادة الفريق، وكيفية تخطي النتائج السلبية خلال المباريات الماضية.

تصريحات عماد النحاس

قال عماد النحاس: “أقل من شهر، الماتشات هتبتدي يوم 14 بمواجهة إنبي وبعدين سيراميكا والحرس والزمالك في خمس مباريات، أهم من بعض والمكسب مهم جدا في الخمس مباريات، واحنا عارفين الأهلي مبيفكرش إلا في المكسب”.

وتابع عبر برنامج حارس الأهلي: “بكرة إن شاء الله مع الجهاز الطبي ومدربين الأحمال، هنتناقش ونشوف الأنسب هيبقي في وديات ولا ونشوف الأفضل ايهـ اللي يتعمل لحد يوم 14 سبتمبر”. 

وواصل: “وبعدين من يوم 14 ليوم 19 هنشوف ايه الأفضل، هنشوف العدد اللي موجود وايه إمكانية تجهيز اللاعيبة، في العشر أيام دول، ولسه هيتم النقاش بكرة في كل التفاصيل بإذن الله، عشان المجموعة اللي موجودة توصل لأفضل حالة فنية”.

وأكمل: “مفيش صعب في قصة أننا نلعب وديات، هو حسب الأعداد اللي موجودة، ودوري الشباب بدأ بس تجهيز اللاعيبة اللي موجودة هنحتاج ودي إن شاء الله”.

عماد النحاس المدير الفني المؤقت للنادي الأهلي

وذكر: “الدوري كله صعب، لأن عدد المباريات قليلة كله بيحارب في المرحلة الأولى، عشان يبقي موجود في السبعة الأوائل، خسارة النقط كلنا شبه متعادلين لأن نفس الدروب اللي موجود موجود في الـ 3 أندية وبطولة الدوري محتاجة النفس الاطول”. 

وأضاف: “مفيش مشاكل في لاعيبة تلعب أو تقعد، هي مجرد وجهات نظر وتفاهم بين الجهاز الفني واللاعبين، وكله بيشوف نفسه الأفضل أنه يلعب، وده مش عيب وعادي بيحصل كل اللاعيبة متاحة وعاوزه تلعب، ولو رجعت للأربع ماتشات هتلاقي عدد كبير من اللاعيبة لعبت”.

وأتم عماد النحاس حديثه: “طول ما أنا في الأهلي، وطول ما توفيق ربنا موجود والإخلاص موجود متفائل جدا للمرحلة الجاية، نعمل حاجة تكون كويسة ونكون عند حسن ظن جمهور الأهلي”.