والد أحمد فؤاد بغدودة: أخد مكافأة 16 ألف جنيه استقطعوا منها 14 ألف ضرائب

عقب والد لاعب منتخب أحمد فؤاد بغدودة، على هروب نجله من مقر البعثة المصرية في تونس، بعد تتويجه بفضية بطولة إفريقيا للمصارعة الرومانية، والمقامة في تونس خلال الفترة ما بين 15 وحتى 21 من مايو الجاري.

والد لاعب منتخب المصارعة أحمد فؤاد بغدودة

وقال "بغدودة"، في مداخلة هاتفية ببرنامج "كلمة أخيرة"، المذاع على فضائية "أون إي"، اليوم الأحد: "معنديش مبرر للي حصل لكن هرد على ما قاله سكرتير الاتحاد المصري للمصارعة: "بيقول ان احمد بياخد 7 آلاف جنيه والله ابني ما شاف اكتر من 2200 جنيه ومن المشروع القومي من شهرين بس، انا راجل على قدي ومعرفش اعبر عن اللي جوايا بكلمك وأن أب زعلان ومكبوت على ابنه وانا برضة مش عارف اوصل لابني".

خصموا منه 14 ألف جنيه بحجه ضرايب

وأضاف، قائلًا: "لغاية وقتنا هذا معرفش عنه حاجة وانا مكنتش اعرف اني طالع مسافر يلعب بطولة افريقيا ومعرفش عنه حاجة، أحمد طول عمره بيحلم بيمدالية أولمبية، ابني بقاله 12 سنة في الاتحاد ماخدش من اتحاد المصاروعة حاجة وبياخد من المشروع القومي 2220 جنيه على البريد ومعايا ايصالات بكدا"، متابعًا: "ابني اتعرض لضغوط قبل افريقيا بشهرين، وبقاله سنة مخدش ولا جنيه من الاتحاد واتصرفله 16 الف جنيه وخصموا منه 14 ألف جنيه بحجه ضرايب واخد 1200 جنيه في الأخر".

وتابع: "أنا راجل بسيط سواق توكتوك، أنا راجل شقيان على ولادي وعندي غيره 2 أطفال، إبني مش بياخد 7 آلاف جنيه، ولايحصل على أموال منذ سنوات طويلة من الاتحاد"، مستطردًا:" الكل طالع يقطع في ابني ابني لعب بطولة في كرواتيا وكان لوحده لو كان هرب مكنش حد هيساله طفش ولا مطفش، أنا اللي بصرف على ابني وبطلع من قوت عيالي عشان أطلع بطل لمصر وفي الاخر يتقال عليه هارب".

ارجع مصر هي أولى بيك

وأكمل: أنا راجل فقير على قدي وبشتغل سواق على توك توك ولا اعرف حد في فرنسا ولا برة، وبحافظ على كرامة ابني في وسط الناس، أنا مش قادر اجيب لابني جزمة يلعب بيها وشحت جزمة من صحابه عشان يلعب بيها".

وأتم: "أنا اللي بصرف عليه والله، وبوجه لابني رسالة ارجع مصر هي أولى بيك وإحنا اتولدنا فيها وهنعيش ونموت فيها".