إيمان العاصي: اللي جذبني لشخصية دلال أنها متناقضة وخرجتني من عباية البنت الكيوت.. وناس كتير بتوقفني في الشارع وهيتجننوا يعرفوا الأحداث الجاية |حوار

اللي جذبني لشخصية دلال أنها متناقضة وخرجتني من عباية البنت الكيوت

كان نفسي اشتغل طول عمري مع محمد سامي

سامي بيعرف يدخل في قلب وعقل الجمهور وبيفضل في الذاكرة لبعد رمضان

الدنيا فيها الخير والشر ودلال لسه محدش عارف دوافعها ايه إحنا لسه في الحلقة 23

الدنيا فيها شخصيات زي دلال بياكل مال اليتامى ويرموا عيالهم في الشارع

أنا بحب المنافسة لأنها مبدعة ولأن الصناعة في الآخر مصرية

بروح المدرسة لبنتي ناس كتير بتوقفني تسألني وهيتجننوا يعرفوا ايه الأحداث الجاية

استطاعت أن تخطف الأنظار منذ الوهلة الأولى من ظهورها في أحداث مسلسل “جعفر العمدة”، الذي يؤدي بطولته الفنان محمد رمضان ويعرض خلال الماراثون الرمضاني الحالي 2023.

النجمة إيمان العاصي صاحبة الأداء الأروع في شخصية دلال، التي خدعتنا طوال المسلسل بطيبتها وتضحيتها بأهلها من أجل زوجها، ولكن ظهر وجه الشر وبانت حقيقتها بعد أن وضحت الحلقات أنها هي من خطفت نجل جعفر العمدة.

حاول موقع “بصراحة”، إيمان العاصي المُبدعة في شخصية دلال لتكشف كواليس العمل، وتعاونها مع الفنان محمد رمضان والمخرج محمد سامي.

وإلى نص الحوار:-

في البداية من الذي رشحك لشخصية دلال؟

اللي رشحني محمد سامي في دور دلال وجذبني للشخصية التنقاضات الكتيرة لشخصية دلال وخروجي من عباية البنت الكيوت الجميلة، وعادة أنا معملتش حاجة زي دلال غير دليدا في مسلسل مملكة إبليس ومن أقرب الشخصيات اللي عملتها في حياتي لقلبي.

-هل كنتي متوقعة ذلك النجاح؟

كنت متوقعة نجاح العمل لأن الاسكريت كان مبشر جدًا وكان نفسي أشتغل طول عمري مع محمد سامي لأنه بيعرف يدخل في قلب الجمهور وفي عقلهم وبيفضل في الذاكرة لبعد رمضان والحمد لله النجاح عدى المقاييس بمراحل الحمد لله وأحلى ردود فعل شوفتها في حياتي ربنا يكملها على خير.

البعض قال إن اللي كان مترشح لشخصيتك في العمل هي درة هل ده صحيح؟

معرفش موضوع الترشيحات اللي قبلي بصراحة مركزتش وارد جدًا إن كان فيه حد مترشح قبلي زي ما أنا بيتعرض عليا حاجات وبرفضها.

محمد رمضان ومحمد سامي دويتو رائع.. كلمينا عن تعاونك مع هذا الثنائي؟

محمد رمضان وسامي عملهم مع بعض بيكسر الدنيا الأسطورة والبرنس وجعفر العمدة عدى المقاييس كلهم والناس بتحيهم جدًا ومبسوطة جدًا بيهم.

-هل يوجد شخصيات مثل دلال ف الحقيقة تخطف ابن جوزها؟

الدنيا فيها الخير والشر ودلال لسه محدش عارف دوافعها ايه أحنا لسه في الحلقة 23 بس أكيد فيه بياكل مال اليتامى ويرموا عيالهم في الشارع مش بيخطفوا ابن جوزهم بس.

-رصيدك من النجاح والخبرة يمنحك الثقة والهدوء أم ما زلت تخشى المنافسة وتشعري بتهديد؟

أنا مش بخشى المنافسة ابدًا أنا بحب المنافسة لأنها مبدعة ليا وللزملاء أحنا بنافس منافسة كويسة، ولسا زمايل غير جعفر العمدة عاملين شغل كويس وباركتلهم وباركولي أنت ناجحة وأنا ناجحة ففيه منافسة لذيذة، وعمري ما حسيت أحساس سلبي تجاه حد أنه نجح وبقةى أحسن مني لأن الصناعة في الآخر مصرية والدراما المصرية بنبسط لما يبقى فيها تنوع وفيها نجوم كتير ولاد وبنات المنافسة من يومها حلوه لأنها بتطول عمر الدراما المصرية.

-ما رأيك في المنافسة في شهر رمضان في وجود هذا الكم الهائل من الأعمال والنجوم؟

النجاح هو النجاح الجماهيري العظيم أحنا بنعمل فن عشان نسعد الجمهور ويقعد في ذاكرتهم كل حتة في العالم الناس بتكلمني وتبعتلي على السوشيال ميديا وناس كتير بتشجع المسلسل ومستنينه ليلة باليلة بروح مدرسة بنتي أجيب أي حاجة هيتجننوا ويعرفوا هيحصل ايه وعندهم أسئلة كتير عن العمل مليون سؤال فده نجاح كبير الحمد لله.