لمياء عبد الحميد تكتب: لعل فيه الإجابة 

يا ترى لما ربنا خلق سيدنا آدم مسح على ظهره ليه؟ لأنه سبحانه وتعالى عارف إننا هنعيش فى خوف ومسحته كانت رحمه فهو الرحمن الرحيم،لكن كمان سيدنا آدم شعر بوحدة كبيرة لأنه كان محتاج من يونس روحه وطبعا ده معناه أن البشر مش بيقدروا يستحملوا الوحدة سبحان الله دى غريزة ربنا خلقنا بيها والدليل ان ربنا سبحانه وتعالى عرض على آدم الحيوانات كلها ومحسش بالونس بردوه، وبالتالى الراجل والست بيحسوا بالوحدة لو طرف مش موجود عشان كده ربنا خلق كائن يختلف فى تكوينه الفسيولوجى عن آدم وسماها حواء؛ لأنها من الحياة وستكون جالبة للحياة.

معقول علاقة الراجل والست مهمة كده؟ طب يا ترى الجواز واللى بيحصل فيه ده ضد اللى ربنا عاوزه ولا زى اللى ربنا عاوزه مننا؟

خلينا متفقين إن الزواج تجربة صعبة ومن رأى المتواضع هى تجربة مش سهلة ومش لأى حد زى ما كنا متخيلين خصوصا فى الوقت الحالى.

الجواز مشروع زيه زى أى مشروع بتفكر تدخله لازم تستثمر فيه وتبذل مجهود لأنه مش هينجح لوحده ولما تقع فى مرحلة معينة لازم تُدرك ده وبسرعةعشان تقدر تحله والأمور تبوظ بينكم وبجد الخسارة هنا مؤكدة.

بيكون فى علامات المشكلة بس إحنا بنعمل مش شايفينها زى إن الست تبدأ تقول مثلا (أنا حاسةانى انطفيت/ حاسةبوحدة/ أنت فين من حياتى/ كفايةعليك أصحابك / كفايةعليك الشغل….) والراجل يبدأ يفقد قيمته عندها ويشوف إنه عبارة عن ماكينة فلوس ومفيش احترام لوجوده، مش بيلاقى حنان/ مش بيلاقى مشاركة/ مراته بتسببه بالأسابيع وعند أهلها ومش مهتمةبيه فيبدأ يعوض نفسه بحاجات تانيةمن مصادر تانيةغير مراته)، أمثلةكتير جدا عن المشاكل بين المتجوزين والشعور بالوحدة اللى شبه مستمرة حتى فى وجود شريكك، ولو فضلنا نتكلم عنها مش هنخلص، للأسف الطرفين هنا بيتسببوا فى أذى لنفسهم ولبعض ولو كمان فى أطفال بتبقى كارثة أكبر.

طيب وبعدين هو ده العادى ولا أصلا فى جواز ناجح بس احنا مسمعناش عنه؟

الإجابة آه لكن بشروط:

أول وأهم شرط هو أن الطرفين يقرروا أنهم هينجحوا.

إنهم يبذلوا مجهود مهما كان بسيط عشان يفهموا بعض واحتياجات الطرف الآخر إيه وإزاى يقدر يسدها عشان يطمنه ويكفيه.

يتكلموا سوا ويسمعوا بعض، يحافظوا على إنهم يبنوا ذكريات حلوة وعشرة طيبة عشان تبقى رصيد للأيام الصعبة.

لو فى أزمة يرجعوا لمتخصص بدرى بدرى عشان يحلوا الموضوع مش عيب على فكرة ولا فشل منكم بالعكس ده قمة النجاح لإنكم واعيين.

اللى عنده قدره على التعلم والقراءة يعمل كده ويفيد نفسه ويحاول ينقل معرفته لشريكه.

نحترم وجع بعض ونحترم مشاركة مشاعرنا المؤلمة لبعض منقللش منها، زى أستاذ ماجد الكدوانى كده ما كان بيحكى فى فيلم هيبتا اختار هتتعرى قدام مين ومتندمش.

اتعاملوا بالحسنى يا جماعة وساعدوا بعض يبقى بينكم حياة سعيدة شوف هى محتاجةايه يريحها واعمله والعكس صحيح لأن البيت اللى فيه هدوء وحب كل اللى فيه قادرين يحققوا وينجزوا اللى محتاجينه أسرع وأفضل بكتير من لو فى نكد وخناق.

بلاش مصطلحات سيئة على بعض وكلام يملانا طاقة سلبية ورفض من اللى قدامنا فى قعدة صحاب ظريفة زى اللى بيتقال يا عم ( الستات دول نكديين/ الرجالة كلهم خاينة يا بنتى/ الستات زنانة ومش بتبطل طلبات/جوزى فاكر بيعمل اللى مبيتعملش/…….)

السيدة سارة زوجة سيدنا إبراهيم انهارت وغارت عليه لما السيدة هاجر أنجبت وهى لأ وقالتله مش هتقعد معايا، ساعتها سيدنا إبراهيم احتواها وبعد السيدة هاجر مقلاهاش انتى معندكيش ثقةفى نفسك ولا قال نكدية ولا قال قرفتينى! بالعكس قدر حبها وحاول يريحها وهى فضلت معاه ووراه فى كل حاجةعشان بتحبه وبتقدره ومؤمنةباللى بيعمله، عشان ده اللى ربنا عاوزة المودة والسكينة والرحمة.

ارحموا بعض، بجد هو مش ده نفس الشخص اللى كنتى طايرة وانتى بتدورى على فستان أبيض عشان فرحك عليه! ومش دى اللى فضلت تعمل حاجات كتير عشان اهلها يوافقوا وضحكتك كانت مالية وشك فى فرحك!

ايه اتغير؟ الظروف ولا اننا ضمنا بعض فخلاص مش هعمل عشانك حاجة

عافروا عشان تنجحوا ونتعامل بإنسانية وتقدير شوية بدل كم الجحود والفشل والطلاق والخيانة من الطرفين اللى بقينا شايفينها وسامعينها عادى دلوقتى.

اخر الابحاث قالت ان نسب الطلاق فى المجتمعات العربية وصلت لآكثر من 40 ٪؜ يعنى كل اتنين بيتجوزوا منهم واحد بيطلق، دى نسبة مرعبة ولازم نقف عندها بجد!

الست أو الراجل ممكن جدا يكونوا نعمة أو نقمة فى حياة بعض.

و ختاماً ولعل فيها الإجابة:

بسم الله الرحمن الرحيم

{وَمِنْ ءَايَاتِهِۦٓ أَنْ خَلَقَ لَكُم مِّنْ أَنفُسِكُمْ أَزْوَجًا لِّتَسْكُنُواْ إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِى ذَلِكَ لَآياتٍۢ لِّقَوْم يَتَفَكَّرُونَ.} صدق الله العظيم.