معلقة على فوز ميسي بكأس العالم.. ياسمين عز: شوفتوا الست لما بتدلع وتدعم جوزها بيوصل لفين (فيديو)

قالت ياسمين عز، "مع خالص محبتي واحترامي وتقديري لكريستيانو لكن بحس إن جورجينا من النوع اللي شاردة 24 ساعة بره البيت زي الغزال الشارد، يعني ممكن يقولها من فضلك نتعشى برا وممكن تقوله رايحة بروفة عشان أقيس فستان للمهرجان، مش مهتمة بتجمع الأسرة، وبتلف وتبرم ومش مهتمة بالبيت".

وذكرت ياسمين عز خلال تقديمها لبرنامجها كلام الناس، المذاع على قناة أم بي سي مصر: "على النقيض بحس أنتونيلا زوجة ميسي حتة النوتيلا بالشوكولاتة عايشة لبيتها وجوزها وأولادها نضاف شعرهم بيلمع وريحتهم نظافة، وبحس إنها أم وست بيت من الستات زوجة صالحة بمعنى الكلمة، من الستات اللي بعد العشا تلاقيها تقطع حتيتين كيكة بالبرتقال وكوباية شاي وتدخل بيهم جوزها في البلكونة".

وأضافت: "واخدة بالها من عيالها وفي كل حتة معاهم وشايلة الواد الصغير على قلبها يا عيني ولا بتضايق ولا بتذمر، ومشوفناش في مرة جرة واحدة معاها تساعدها عشان تشيل ابنها، زي ما بنشوف عندنا كثير، مع إن اللي زيها ممكن تجيب 100 واحدة تساعدها".