"بيتريقوا علينا".. زوجة رامي جمال تكشف معاناته من "المواقف المحرجة" بسبب البهاق

كشفت الفنانة المعتزلة ناريمان عن تعرضها وزوجها الفنان رامي جمال، للتنمر في بداية إصابته بالبهاق، مشيرة إلى أنها تتذكر كل ذلك. وأضافت ناريمان في منشور عبر حسابها الشخصي على إنستجرام قالت فيه: «يا حبيبى ربنا يعافيك ويعفو عنك وعن كل مريض يارب أنا فاكره الموقف دا كويس جدا وفاكرة كمان لما بدأ يزيد وكنت بتبقى مضايق من شكل ايدك وأنا كنت بفضل مسكاها طول الوقت علشان متبصش عليها، وأنهم كانوا بيتريقوا علينا أنى ماسكه ايدك طول الوقت».

وتابعت: «فاكرة كمان كذا موقف حصل خلاك تقرر تتكلم عن الموضوع علشان ساعتها الناس كانت متخيلة أنه لسه جايلك لا هو أنت أعلنت بعدها بحوالى 3 سنين أو حاجه لأنه أنا فاكره جالك قبل ما نتجوز بشوية كمان مش قبلها على طول بس أنا اتعلمت منك في الفترة دى الرضا وشفت بعدين أد ايه ربنا بيحبك ومحبب فيك خلقه».

تعرض رامي جمال للتنمر

وكان الفنان رامي جمال قد كشف عن موقف مؤثرًا تعرض له بسبب إصابته بمرض البهاق. وأَضاف في برنامج عالوعد المذاع على قناة sbc الفضائية: «كنت خارج من الاستديو وسلمت على واحد، ومد إيده، ولما شاف إيدي، وسحب إيده، ووطى عمل نفسه بيربط الجزمة».

وتابع: «فهمت وقومت واخد عربيتي، وحاول يلحقني ويقولي أنت زعلت ولا إيه؟ قولت له، لا مزعلتش خالص، وروحت عند ناس صحابي كنا بنلعب بلاي ستيشن، وسبت دراع البلايستشن، وكتبت لو مقبلتونيش بالشكل ده، أنا معنديش مشكلة وعندي بيزنس تاني على الرغم من أن الفن بحبه جدًا لكن مش عايز يبقى وجودي بتعاطف». وأردف : «مش شايف مرض عشان يبقى فيه تعاطف، ده حب من ربنا، وبيختبرني هل أنت راضي ولا لا؟ وأنا راضي جدًا، كتبت البوست الساعة 11، الدنيا مقلوبة بمعنى الكلمة، مفيش فن قدمته عملي حالة التعاطف اللي شوفتها دي، وأنا معنديش مشكلة من زعل حد بسبب القصة دي لكن عندي مشكلة أنك تتعاطف معايا كفنان بسبب مرضي».