عمرو أديب: زبالة الترع هيطلع منها تنين وتعابين وتماسيح مش ناموس

علق الإعلامي عمرو أديب؛ على تلوث ترعة سقارة البحرية التابعة لمحافظة الجيزة بالقمامة بعد تطويرها وتبطينها في إطار مشروع تبطين الترع.

وقال أديب خلال برنامج "الحكاية" المذاع على قناة "إم بي سي مصر": "الترعة بعد تطويرها تلوثت بالقمامة والأمر ليس في هذه الترعة فقط"، مضيفًا: "اللي مرمى دة مش زبالة بيت؛ دي زبالة مصانع أو مطاعم؛ دي مش بقايا منازل دي مصانع ووش بتصب زيت عربيات وكل دة بيودينا في 60 داهية".

وتابع: "أنا شامم الريحة من الشاشة؛ في واحد بيقول نركب كاميرات؛ هنركب كاميرات لكل مواطن؟ دا هدر للمال؛ لو كدة نحط فلوس الترع دي في حاجة تانية".

وواصل: "بتلاقي ناس تقولك في ناموس في شارع الهرم؛ دا النموس أمره بسيط دانتوا هيطلع ليكم تعابين وتماسيح هيطلع ليكم تنين من الترعة"، موضحًا: "يجب على المحليات العمل بشكل أكبر وتوفير أماكن لجمع القمامة من المواطنين؛ لكن الحل ليس إلقاء المخلفات في الترع".

واختتم: "لا نريد أن نظل في دائرة؛ المواطن يتهم الدولة بعدم توفير أماكن لجمع القمامة والدولة تتهم المواطن بإلقاء المخلفات في دائرة".