ياسمين عز بعيدًا عن أزمة شيرين عبد الوهاب: يا بنات اختاروا الرجل الصح

تحدثت الإعلامية ياسمين عز عن أزمة الفنانة شيرين عبد الوهاب، مؤكدة أنها شغلت الجميع خلال الأيام الماضية.

وأوضحت ياسمين عز أثناء تقديم برنامج "كلام الناس" عبر قناة mbc مصر، أن بخلاف ما تعرضت له شيرين عبد الوهاب، فهي ترغب في الحديث مع المشاهدين ضرورة اختيار شريك الحياة المناسب.

وقالت: "ياريت نحط كام خط تحت كلمة الحياة، لأن الوظيفة الأساسية لشريك الحياة أنه يقويك ويسندك، وفي شريك حياة بيكون دوره أنه ينهي الحياة دي، يحبطك ويكسرك".

وتابعت ياسمين عز: "حولينا نماذج كتير لرجالة شدوا زوجاتهم لفوق، ونماذج تانية لستات شدوا الرجالة لتحت، والله مهما كان حواليك ناس كتير حلوة، لكن شخص واحد كفيل أنه يدمر حياتك كلها، يسرق حلمك يسرق عمرك، ومش بعيد كمان يسرق فلوسك، عشان كده مهم جدا قبل الجواز تختاري صح وتاخدي رأي الكبار، وتسمعي كلامهم، ماتمشيش بدماغك وخلاص".

وأضافت: "أنا طول الوقت بقول للست حافظي على جوزك ودلعيه، بس برضه طول الوقت بقول إن الكلام ده للرجل اللي شايل مراته في عيونه وبيعاملها أحسن معاملة وبيدعمها عشان تكون ناجحة وسعيدة".

"المقصود هو الرجل السوي، اللي يكملك، ماتتجوزيش غير اللي يراعي ربنا فيكي، بيكسب من عرق جبنيه حتى فلوس قليله، ما تاخديش أي رجل طمعان فيكي، يبقى عايز يعيش على حسابك وحساب نجاحك".

وقالت: "اتجوزي الرجل اللي يبقى عايز ولاد منك، مش يتلكك بأي حجة عشان لما يسيبك مايكونش في حاجة تربطه بكي، ونفس النصيحة بقولها للرجل، ما تتجوزش الست اللي تحسسك أنك أقل منها، أو تحسسك أنها بتصرف عليك وتصغرك قدام الناس".

وواصلت ياسمين عز نصائحها: "ما تتجوزش الست اللي طول الوقت بتحسسك أنها تكرمت ومنت عليك واتجوزتك، أو الست اللي تتكسف تمشي جنبك في أي مناسبة، وتتلكك لك في الفاضية والمليانة".

واختتمت ياسمين عز حديثها مؤكدة أنها تتحدث بشكل عام ولا تسقط كلامها على قصة شيرين عبد الوهاب وحسام حبيب.