الرئيس السيسى خلال حفل تخرج دفعة جديدة من كلية الشرطة: دوركم منتظر عند كل الناس ومقدراه طالما إن الدور ده بيحترم إنسانيتهم.. إحنا بنشتغل من غير ضوضاء وقضينا على الإرهاب

أكد الرئيس عبد الفتاح السيسي، أن التضحيات التى قدمها الشهداء كبيرة من أجل أمان واستقرار ومستقبل الدولة المصرية، قائلا: "اسمحوا لى أن أرحب بكل السادة الحضور.. الأسر اللى موجودة.. برحب بيكم.. أهلا وسهلا.. واسمحوا أن أهنئكم بتخرج أبنائكم وبنتاكم.. ألف ألف مبروك".

وتابع الرئيس السيسي: "اللى انتوا شايفينو ده.. ده تمن لأرواح أبناء مصر.. تمن غالى أوي.. لكن أن يكون التمن ده حماية وتأمين واستقرار أكثر من 100 مليون مش بس فى امانهم وسلامهم.. ومستقبلهم.. ولو البلد كانت راحت مكنشى هيكون فيه مستقبل لحد.. مش هقول مش تزعلوا ولا تتأملوا.. احنا معاكم.. وقبلنا.. ربنا موجود معاكم.. خلى بالكم.. الشهيد عند ربنا حاجة جميلة أوى.

وشدد الرئيس عبد الفتاح السيسي، على مكانة الشهيد عند الله قائلا: "والله الشهيد عند ربنا حاجة جميلة اوى.. ربنا اللى بيعطيه وبيعوض عليه.. وعليكم.. هو ربنا سبحانه وتعالي.. علشان مش ننسى.. الحمد لله رب العالمين.. الأمور اتحسنت كتير أوى بفضل الله سبحانه وتعالي.

وأكمل الرئيس السيسي: "كل التهديدات والإرهاب زالت بفضل الله وبفضل أبناء مصر من الشرطة والجيش وكل قطاعات الدولة إحنا فى مكان كويس أوى.. ولسه".. طيب مطلوب مننا أكثر العمل.. نعمل أكثر من كده.. نقدم الوفاء لهذه الدماء.. مرة ثانية كل التحية والمحبة والاحترام والتقدير ليكم وأرواح الشهداء والمصابين والأسر.. وربنا يجزيكم خير الجزاء.. ولن ننساكم ابدا.. لن ننساكم ابدا.. إن شاء الله".