أحمد موسى يطالب بمحاكمة كل من يشكك في انتصار أكتوبر: «خائن للوطن»

تحدث الإعلامي أحمد موسى، عن دور المشير أحمد إسماعيل، وزير الحربية في حرب أكتوبر 1973، مشيرا إلى أن المشير أحمد إسماعيل كان له دور كبير في الحرب.

وأضاف خلال برنامج «على مسئوليتي»، المذاع على قناة صدى البلد، «المشير أحمد إسماعيل قائد عظيم وكان مدير المخابرات العامة ثم وزيرا للدفاع.. كمان الرئيس الراحل محمد أنور السادات قال له اخترتك وزيرا للحربية رد قائلا تمام يا فندم ليتحقق الانتصار مع قادة وأبطال الحرب نتذكرهم جميعا ونتذكر الرئيس السادات القائد الحقيقي والزعيم الوطني اللي تاريخه كله نضال وعظمة وأخذ كل القرارات الصعبة منها قرار الحرب».

وأشار إلى حديث الإذاعي الكبير فهمي عمر، حول بيان ثورة 23 يوليو، قائلا: «الرئيس السادات هو اللي قال بيان الثورة وكان موجود والأستاذ فهمي عمر كان شاهد على ده لما الرئيس السادات راح الإذاعة علشان يقول البيان كان الرئيس السادات موجود ده الرئيس الذي قتله الإخوان الإرهابيين وهو يحتفل بالنصر وسط أولاده ورجاله وهو من أخذ قرار الحرب علشان تعرف خسة ونذالة الإخوان».

قال: «الرئيس السادات زعيم خالد انتصر في الحرب كان بيحتفل بالنصر في وجود الجيش والعرض العسكري ويأتي الإخوان لاغتياله في مشهد العالم الكل يتابعه هو حد بيحب بلده وجيشه وقيادته يعمل اللي عمله الإخوان واغتيال الرئيس السادات.. دول عمرهم ما كانوا مننا أبدا خدعونا لما قالوا إن إحنا بنحب مصر وهم عمرهم ما حبوا مصر أبدا هم حب نفسهم بس كانوا عايزين الحكم من وقت المجرم حسن البنا وهم شغالين في التشكيك واغتالوا الرئيس السادات يوم النصر طول عمرهم أيدهم ملطخة بالدماء كلهم خونة اللي يتكلم على جيشه وعلى شرطته وقضائه ومؤسسات بلده على طول كده في خانة الخائن واللي يشكك في انتصار أكتوبر خائن واللي يشكك في الانتصار مكانه القضاء.

تابع: «لن نسمح بهذه الهرتلة أو التشكيك في نصر أكتوبر اللي هو فخرنا اللي هندافع عنه وعن كل واحد شارك في والرئيس السيسي بيكرم كل أبطال أكتوبر علشان الناس دي تستحق التكريم خدمت وأدت وانتصرت ونقف لهم كلنا تعظيم سلام والقائد الأعلى للقوات المسلحة أدى التحية لأبطال حرب أكتوبر.. دائما احتفالات أكتوبر الواحد بيحب يكون حاضر فيها كمان تشعر بالفخر وأنت مع أبطال الانتصار ولابد من الاحتفاء بقادة النصر وكل بطل خدم بلده ودافع عن مصر لازم نقف ضد طيور الظلام وكلنا نواجه دعوات الفوضى مع بعض والبلد بلدنا كلنا ومش بلد حد وبلدنا إحنا بلد الـ 100 مليون ودورنا مهم من أي وقت مضى».