دور الصبي الرقاصة يشغل أزمة بين محمد رمضان وعائلة فلوكس.. ونجل الأخير: أنت رقاصة عريان مش دريان

أشعلت تصريحات محمد رمضان الأخيرة حول دورصبي الرقاصة حرب تصريحات مع الفنان القدير فاروق فلوكس، ونجله أحمد فلوكس.

محمد رمضان يهاجم فاروق فلوكس

وكان قد صرح محمد رمضان خلال لقاءه ببرنامج بيت العيلة مع الإعلامية نجوى إبراهيم على قناة النهار: فى فنان كبير عمل أشياء أرفض أن افعلها، وكان بيعمل أدوار صبي عالمة ولو هشحت مش هبقي زيه، رغم أن هذا الفنان قدير.

أحمد فلوكس لـ محمد رمضان: عينك على دور الرقاصة نفسها

ليخرج أحمد فلوكس مدافعًا عن والده، عبر حسابه الرسمي بموقع التواصل الإجتماعي فيسبوك: شوف يا حماده، انت ترفض إنك تعمل دور صبي رقاصة لأنك دايماً نمبر وان، فأكيد هتبقى عينك على دور الرقاصة نفسها، مش الصبي بتاعها، وانت ما شاء الله ناجح في ده جداً وبتعمله سهل وانت عريان ما دريان.

وتابع: نمبر وان بقى يا سيدي، زي بالظبط ما يكون واحد مسجل نشل، استحالة يحلم أن يكون أمين شرطة حلمه هيكون أكبر من كده، هيكون نمبر وان.

أحمد فلوكس لـ محمد رمضان: الحمد لله أبويا مخلفش واحد مسجل نشل

وأضاف فلوكس: أنا والدي عمل دور صبي رقاصة لأنه بيعشق التمثيل والأدوار الصعبة، والحمد لله إنه ربى رجل بيحترم نفسه وبيحترم اللي بيقدمه للناس، وبيحترم بلده، ودمه فداء ليها، لأن شعب بلده هم اللي عملوه فلازم يقدملهم أحسن حاجة، وبحمد ربنا أكتر وأكتر، إن ما خلفش واحد مسجل نشل لأن المسجل هتكون أقصى طموحه أن يكون أسطورة، وهيرقص برضه بس عريان.

واختتم أحمد فلوكس كلامه: وبعدين مش شرط تعمل دور صبي رقاصة، ممكن تكون نجم كبير بس أخلاقك أخلاق صبي الرقاصة، وده الأخطر مع إن والله صبي الرقاصة ولا بيقهر حد ولا بيظلم حد، ولا ليه في سكك الشيوخ والدجل، ولا نصاب ولا بيحكها مع الكبار.

فاروق فلوكس لـ "بصراحة": محمد رمضان عيل بالنسبالي

رد الفنان فاروق فلوكس على هجوم الفنان محمد رمضان، مشيرًا إلى أنه دائمًا يُهاجم الفنانين القدام.

وقال الفنان فاروق فلوكس في تصريحات خاصة لموقع “بصراحة” الإخباري: “كتر خيره مش هتخذ إجراء قانوني ضده الجيل الجديد كله مش عارف ماله كل يوم والتاني بيهاجم الفنانين القدام فـ اللي زي ده مش هرد عليه”.

وأضاف: “كويس إني أنا أثرت فيهم وهو كل ما يزيد في هجومه عليا ده فخر ليا أنا، ده معناه إني أنا شاغله هو عيل صغير بالنسبالي ده طفل فلما يعترض عليا اي يعني مش فارق بالنسبالي”.