تامر أمين: مبساعدش الشحاتين اللي في الشارع.. ومكانهم السجن

أعرب الإعلامي تامر أمين، عن إعجابه بلافتة علقها أهالي قرية كفر أبوسالم، تمنع دخول المتسولين وتتوعد بتسليمهم للشرطة.

وقال تامر أمين، خلال تقديم برنامج «آخر النهار» المذاع عبر فضائية «النهار»: «أنا مساعد الشحاتين اللي في الشارع، لا أتصدق على اللي واقفين في إشارات المرور والنواصي وتقول لله، بتصدق في أماكن تانية مش هأقولها حتى لا أضيع أجري بالمن والأذى».

وتابع: «الشحاتين مافيا وعصابات، اللي بيمد إيده وعاملها شغلته مش محتاج يسترزق من الشغلانة دي، المحتاجين الحقيقين تحسبهم أغنياء من التعفف، عندهم عفة نفس، والمحتاج وعنده مشكلة بيسأل ربنا، ربنا الرزاق، اللي بيسأل الناس متثقش فيه».

وأردف: «كل صداقاتنا وزكاواتنا يجب أن تكون للمستحقين، نبذل مجهوداً في البحث عنهم ولا نستسهل ونمنحها للشحاتين».

وأشار إلى أن الشحاتين والمتسولين، مكانهم السجن، مردفا: «بالقانون يتعملهم تحري ويتحبسوا، التسول والشحاتة ليست مهنة يعرفها القانون، ومن يضبط يجب أن يقبض عليه، ولحد ده ما يحصل، احرموهم من مصدر دخلهم، لما يلاقون الحنفية اتقفلت هيدوروا على شغل، طول ما بتدوهم فلوس، هيفضلوا يشحتوا، وفيه ناس بتديهم الفلوس إحسان وناس بتديهم زهق».