«عشان يحسوا بالشقى».. محمود التهامي يكشف سبب أصطحابه أولاده في الحفلات

كشف المنشد الديني محمود التهامي عن سبب إصطحاب أولاده معه في الحفلات، من خلال منشور عبر صفحته الرسمية بموقع التواصل الاجتماعى "فيسبوك".

وقال محمود التهامي: "الناس اللي بتسأل أنا ليه أبتديت أخد ياسين والثائر حفلات وموالد وهما لسه صغيرين؟ أولاً علشان ثقافتنا في الصعيد مافيش حد صغير، والصغير بيتولد كبير، فعلشان يعيشوا الواقع، ويحسوا بالشقى، والسهر والسفر والتعب بجد”.

وتابع:" لو ليهم نصيب يكملوا في المشوار، يبقي أتأسسوا صح، وجابوها من الموالد، والشارع من وسط الناس الحقيقية مش المصطنعة، ويشوفوا الثقافات المختلفة في التعامل وخبرتهم تتوتق من الصغر”.

وأضاف:"فكرة إني أعلمهم إنشاد وموسيقي ويطلعوا معايا حفلاتدبي أو الأوبرا ، أو مكتبة الإسكندرية ، وحفلات الجمهور ال A Class، هتخليهم يحسوا أنهم في رحلة ، مش في ( مهمه ) ورسالة وعمل”.

وأوضح:" طبعاً هما ممتعضين نوعا ما لأن الحفلات دي زي النهاردة مثلاً في المنصورة فيها سفر ٤ ساعات ذهاب ، و٣ ساعات عودة ، بالاضافة لوقت الحفلة ال٣ ساعات. ودا غير الحفلات أللي أتعودوا عليها ، ساعة او ساعة ونصف مسرح ، و في الغالب داخل القاهرة .

وأكد:"بصبرهم وبقول ليهم أني كنت في سنهم زمان بسافر الحفلات دي في طرق غير ممهدة. وبال ٦ ساعات و٧ ساعات. في عربية بيجو ٧ راكب. غير مكيفة طبعاً ولوحدي مع الفرقة ، مش مع أبويا زيكم في باص سياحي مكيف .

وأختتم كلامه بدعاء:" ربنا يقدر ليهم الخير ، ويبعد عنهم ولاد الحرام، وينفع بيهم البلاد والعباد”.