رئيس التحرير
محمود سعد الدين
الرئيسية حالا القائمة البحث

سهير جودة تدافع عن شيرين عبدالوهاب: هو إحنا بنحب شيرين ولا بنعاقبها لأنها رجعت

سهير جودة وشيرين عبدالوهاب
سهير جودة وشيرين عبدالوهاب

دافعت الإعلامية سهير جودة عن النجمة شيرين عبدالوهاب بعد التنمر على شكلها في  أخر ظهور لها منذ أيام في عزاء والد المايسترو أمير عبدالمجيد بالقاهرة. 

وكتبت سهير جودة عبر صفحتها الرسمية بموقع التواصل الاجتماعي “فيسبوك”: إحنا عايزين نوصل شيرين عبد الوهاب لإيه؟!لما اختفت قلنا ياريت ترجع، ولما رجعت اتنمرنا على لبسها، ولما غابت تاني طالبنا بعودته، ولما ظهرت من جديد فتحنا عليها باب السخرية من شكلها وطريقتها واختياراتها!

وأضافت: طيب وبعدين؟!، إنتوا عايزينها ترجع عشان تستقبلوها بالأحضان ولا عشان تحاكموها على كل تفصيلة في حياتها؟!، كل مرة بتاخد خطوة وترجع تظهر للناس تلاقوا ألف طريقة تحسسوها إن ظهورها كان غلطة… وإن غيابها أرحم لها من مواجهة كل القسوة !!

وتابعت: هو إحنا بنحب شيرين ولا بنعاقبها لأنها رجعت، دي إنسانة قبل ما تكون نجمة، عندها مشاعر وأزمات وتعب وانكسارات زي أي إنسان، ومش مطلوب منها تكون طول الوقت في أحسن حالاتها عشان تستحق مننا الاحترام!

ووجهت رسالتها لكل متنمر ، قائلة: ارحموا شيرين شوية،  مش كل ظهور ليها لازم يتحول لمحاكمة،  ومش كل صورة لازم تبقى مناسبة جديدة للتنمر!، ورسالتي  للشخص اللي صور شيرين عبد الوهاب،  للصحفي أو صاحب الكاميرا أو أيا كانت هويته يخليني أفترض حسن النية، إنك صورت اللقطة ونشرتها لأنك شايف إن الفيديو مناسب للنشر…

واستكملت: لكن لو أنت بنفسك شايف إن اللقطة مش مناسبة وإنها ممكن تجرح صاحبتها أو تعرضها للسخرية والتنمر، يبقى السؤال: ليه نشرتها، استفدت إيه لما حوّلت لحظة من حياة إنسانة لمادة يتنمر عليها الآلاف؟

وواصلت: ارتحت لما الفيديو جاب مشاهدات والريتش علي والتعليقات زادت؟!، ولو الفيديو حقق لك مكسب مادي،  تقدر تبقى مبسوط بالفلوس دي، وأنت عارف إنك ساهمت في موجة من الإهانة والتجريح؟

واختتمت: هتنام مرتاح، هتاكل من لقمة فلوسها متلوثة بأذى إنسانة؟!، فيه حاجة اسمها ضمير المهنة، وفيه حاجة اسمها إنسانية، وياريت الاتنين يفضلوا أهم من الريتش والمشاهدات.

التنمر على شيرين عبدالوهاب 
 

وتعرضت شيرين عبدالوهاب لحالة من التنمر والهجوم عليها عقب ظهور الأخير في عزاء والد المايسترو أمير عبدالمجيد، وذلك بسبب التغير في ملامح وجهها. 

الحالة الصحية والنفسية لـ شيرين عبدالوهاب 

وفي سياق متصل، كشف الطبيب المعالج لـ شيرين عبدالوهاب، لـ«بصراحة»، تفاصيل حالتها الصحية والنفسية، وذلك بعد حالة الجدل التي أثيرت خلال الساعات الماضية بشأن تغير ملامحها وزيادة وزنها، عقب ظهورها في عزاء.

وقال طبيب شيرين عبدالوهاب إن حالتها النفسية ليست في أفضل حالاتها خلال الفترة الحالية، موضحًا أنه لم يلتقِ بها منذ شهرين ونصف، كما أنه لم يتمكن من التواصل معها طوال هذه الفترة.

وأضاف: «الحالة النفسية دي بتعلي هرمون الكورتيزون في السما، وده بيعلي الوزن، يعني لو شربت مياه بتزيد»، مشيرًا إلى أن التغيرات التي طرأت على وزنها ترتبط بحالتها النفسية.

وتابع طبيب شيرين عبدالوهاب: «الفنان إنسان طبيعي زي أي حد في الدنيا، مش كائن خيالي، ولو المود بتاعه فيه مشكلة بيوقف كل حاجة».

واختتم حديثه برسالة إلى الجمهور، مطالبًا بالتوقف عن تداول الشائعات والتعامل مع الحالة الإنسانية لشيرين برحمة، قائلًا: «ارحموا الناس، حرام الموضوع مش تريند، ارحموا من في الأرض يرحمكم من في السماء، اتقوا ربنا في الناس، التريند هيودينا في داهية، كما تدين تدان».

تم نسخ الرابط