ميشيل ميلاد عن دوره في ما لم يُحك عن بني مزار : أول ما قريت الدور قولت إنه صعب جدا وروحت لدكتور نفسي علشان أفهم الشخصية

تحدث الفنان ميشيل ميلاد عن دوره في قصة ما لم يُحك عن بني مزار من سلسلة القصة الكاملة، وكيف استعد لهذا الدور. 

وقال ميشيل ميلاد خلال لقائه ببرنامج "الحكاية" المُذاع عبر قناة  إم بي سي مصر: احنا بنتعب في الشغلانة وطول الوقت بنسعى لتقديم حاجة  مختلفة للجمهور، وده المتعة بالنسبة لنا

وأضاف: أنا يمكن مبقاليش كتير في الشغلانة، لكن بمثل من 2011 ، ووقفت على كل مسارح الدولة، وده اللي اداني خبرة في أي دور بقدمه.

وتابع: أنا اول ما قرأت الدور في مالم يحُك عن بني مزار ، قولت لأستاذ مجدي الهواري  إن الدور صعب جدا، وكل مشهد فيه مدرسة مختلفة للتمثيل.

واستكمل:  روحت لدكتور نفسي علشان أفهم الشخصية، وقالي إنه أقرب لشخص عندي فصام في الشخصية، وأي فكرة بتيجي في دماغة بتكون من مؤثر خارجي مالهاش علاقة بالواقع.

وواصل: الأدوار اللي زي دي بتاخد من الروح، ومحمد ممدوح كلمني بعد الدور ده قالي إنت تعبت في الدور ده؟ قولت له جدا لأنها أدوار مالهاش تكنيك معين.

واستطرد: وأول حاجة عملتها إني قريت كل التفاصيل عن مرض الفٌصام من الألف للياء، ودي متعة الشغلانة، وسافرت المنيا في قرية اسمها بني خالد وقعدت هناك يوم كامل، علشان اعرف المنياوي بيتكلم ازاي، واكتشفت إنه مختلف تماما عن الصعيدي.

واختتم: الدور صعب جدا لأن كل مشهد فيه مدرسة مختلفة عن الكوميديا اللي فيها المشهد  واحد زائد واحد يساوي اتنين، وطلبت من أستاذ أحمد نادر جلال إني أخد مشهد الضرب مرة واحدة، لإني لو قطعت هبدأ من الأول، وكنت عايز أخد المشهد مرة واحدة زي المسرح ، وهو وافق علطول.

 حكاية ما لم يُحك عن بني مزار 

وتعتبر  حكاية ما لم يُحك عن بني مزار هي الحكاية الثانية من سلسلة القصة الكاملة

أحداث حكاية ما لم يُحك عن بني مزار 

وتتناول الحكاية إحدى أبرز القضايا التي شغلت الرأي العام المصري عام 2005، والمعروفة إعلاميا بـ «مذبحة بني مزار التي وقعت في إحدى مناطق محافظة المنيا، والتي تعتبر من أهم القضايا الجنائية التي آثارت جدلا واسعا لما احتوت عليه من تحقيقات وتفاصيل  آثارت اهتمام الرأي العام وقتئذ

فريق عمل حكاية ما لم يُحك عن بني مزار

ويضم فريق عمل حكاية ما لم يُحكى عن بني مزار مجموعة من النجوم منهم أحمد عبدالوهاب، وأحمد عبدالحميد،  وميشيل ميلاد، وعارفة عبدالرسول، وصفاء الطوخي، ومراد مكرم، والعمل من تأليف هاني سرحان، وإخراج أحمد نادر جلال. 

الحكاية 

الحكاية هو برنامج حواري شامل متنوع يقدمه الإعلامي عمرو أديب، يتضمن العديد من الفقرات السياسية والفنية والاقتصادية والاجتماعية، كما يعرض البرنامج بمستجدات الشأن العام.

مواعيد عرض برنامج الحكاية والقنوات الناقلة

ويٌُعرض برنامج الحكاية من الإثنين إلى الجمعة في تمام الساعة العاشرة مساء بتوقيت القاهرة عبر قناة غم بي سي مصر.