أول تعليق من نهى صالح بعد القبض على المتهم في وفاة شقيقها

علّقت الفنانة نهى صالح على نبأ القبض على المتهم بالتسبب في وفاة شقيقها، معربةً عن ارتياحها لهذه الخطوة، ومؤكدةً ثقتها في أن العدالة ستأخذ مجراها.

وكتبت نهى صالح عبر حسابها الرسمي بموقع التواصل الاجتماعي “انستجرام”: اللهم لك الحمد يارب أخيرا هقدر نام يارب القصاص منه في الدنيا والآخرة زى ما قهر قلبي ويتم عياله،  أنا ما حستش باليتم إلا لما خالد راح منى حسبي الله ونعم الوكيل.

حادث شقيق نهى صالح

وفي وقت سابق، كشفت نهى صالح تفاصيل الحادث الذي نتج عنه وفاة شقيقها، حيث كتبت عبر حسابها الرسمي بموقع التواصل الاجتماعي "فيسبوك": لكل واحد دافع عن العربية وقال إن مفيش عليها غلط، الفيديو قدامكم.

وأضافت: أخويا كان ماشي هو وصاحبه على طريق سريع، وكانوا في الحارة اليمين، وقدامهم عربية ماشية في الشمال، وفوقهم كاميرا سرعة، يعني ماكانوش بيجروا، لأن أي سرعة زيادة كانت هتتسجل. وبعد ما عدّوا الرادار، فجأة سواق العربية قرر يدي إشارة يمين ويهدي مرة واحدة، وينقل من الحارة الرابعة للحارة الأولى علشان ياخد المخرج بالعرض.

وتابعت: اللي حصل إنهم اتفاجئوا بالعربية قدامهم، فوقع الحادث. والأسوأ من كده إن سواق العربية كمل طريقه ولا كأن حاجة حصلت، حتى ما وقفش لحظة يشوف في إيه، مع إن الموتوسيكلات كانت مولعة وفيه أرواح بتصارع الموت، وأحب أقول لسواق العربية: مش بس أخويا في رقبتك، كمان عياله اللي شافوا أبوهم بيموت قدام عينيهم. المشهد ده هيفضل عمره ما يروح من ذاكرتهم.

واستكملت: أما اللي صوّر الفيديو، فمش لاقية كلام يوصف اللي عملته. إزاي قدرت تصور الحادث، وتشوف النار مولعة، وتكمل طريقك من غير ما تحاول تساعد؟ إزاي كان همك إنك تنزل الفيديو علشان المشاهدات واللايكات، بدل ما تنقذ ناس كانت محتاجة أي حد يقف جنبها؟

وأردفت: عيال أخويا كانوا ممكن مع الوقت يحاولوا يتجاوزوا اللي شافوه، لكن الفيديو اللي اتصور بقى بيرجعهم لنفس اللحظة كل مرة يشوفوه. وده وجع جديد بيتكرر عليهم كل يوم، أنا فوضت أمري لله، وهو حسبي ونعم الوكيل.

واختتمت: كل اللي بطلبه هو حق أخويا وأنس، ومحاسبة كل واحد كان سبب في اللي حصل، سواء سواق العربية أو اللي صوّر الحادث وما حاولش يساعد. اللي حصل دمرنا، ودمر حياة مراته وعياله، وكسر قلب أسرتنا كلها، ولازم كل مسؤول يتحاسب