عار على العالم.. شاهد تصريحات حسام حسن لدعم فلسطين قبل مواجهة مصر والأرجنتين

تحدث حسام حسن، المدير الفني لمنتخب مصر، عن سبب رفع علم فلسطين بعد الفوز على أستراليا بدور الـ 32 والتأهل لدور الـ 16 لمواجهة الأرجنتين والمقرر لها غدًا الثلاثاء.

وقال حسام حسن في المؤتمر الصحفي الخاص بمباراة مصر والأرجنتين: «رفع علم فلسطين؟ كل واحد ليه مشاعر، وإذا وُجد فرد في العالم محسش بالشعب الفلسطيني ميبقاش بني أدم، سواء عربي أو اوروبي أو أمريكي».

حسام حسن: عار على العالم اللي سايب شعب فلسطين بدون مساعدة

وتابع: «لو فيه حيوان حد قسى عليه بتطلع حقوق الانسان والحيوان والدنيا كلها، لكن لما كل يوم ناس بالألافات يحصل معاهم كدا وأطفال وستات واحنا قاعدين في تكييف وفوقنا سور وشقق وأكل قدامنا وفيه أطفال وشعوب قاعدة في خيم وصيف وشتا وشمس ومطر، لما بتبقى الدنيا حر عايزين تكييف، ولو شتا عايزين بيت مقفول ودفايات وغطا، الشعب الفلىىىطيني قاعد في العرا».

وأضاف: «فيه أطفال مش لاقيين ياكلوا وبيتعرضوا لأمراض من قلة الأكل والنوم والحياة، لو محسيتش بيهم يبقى مليش لازمة أعيش، لو مفيش بني آدم حس باللي بيحصل يبقى مش بني أدم، مينفعش يعيش».

وواصل: «الناس اللي في إيديها القرار تحط نفسها وأولادها إنهم يقعدوا يوم واحد بس في الشارع والشمس والمطر يقعدوا بس يجربوا ونشوف هيعيشوا ازاي، لما بيحصل سيول هنا الناس كلها بتجري، لكن السيول بتحصل هناك ومعندهمش حاجة يتدفوا بيها، عاااار على العالم كله وعلينا كله وعلى اصحاب القرار اللي سايبين بني ادمين زينا زيهم.