“عايزين القصاص”.. أول تعليق من جد المتهم في مذبحة دربالة

بملامح يغلب عليها الحزن، وصوت متقطع من شدة الصدمة، بدأ جدّ المتهم في واقعة مذبحة دربالة بالإسكندرية كلامه، وهو مش قادر يستوعب اللي حصل، وقال:“اللي حصل ده مش سهل.. ده وجع كبير قوي”.

حكى الجد إنه ماكنش عايش معاهم في نفس البيت، لكن يوم الأربعاء الصبح حوالي الساعة 8 أو 8 ونص، جاله تليفون يخبره إن في مصيبة حصلت، وإن ابنه ووالدته اتقتلوا، وقال: “اتفاجئت بالخبر.. ماكنتش مصدق”.

وأضاف إن الجدة كانت تعبانة جدًا، وكانت رايحة تعمل عملية في رجلها تاني يوم، لكن الحادث حصل قبلها بيوم، مؤكدًا إن المتهم كان عايش معاها في نفس البيت بالدور الأرضي، وهي اللي ربّته من وهو صغير بعد ما والدته سابته.

وقال بحزن:“ستّه هي اللي ربّته وكبرته.. كانت شايلة همه وبتأكله وتشربه، وعمرها ما قصّرت معاه”.
وأوضح إن الكلام اللي سمعه من قرايبهم والناس في المنطقة إن المتهم كان بيتعاطى مخدرات، وسلوكه كان فيه مشاكل من زمان، لكن قال:“الله أعلم كان عامل إيه يومها بالظبط”.

وكشف إن المتهم كان له مواقف قبل كده، منها إنه كسر سايبر وعمل مشاكل، وكمان حاول يعتدي على حد من قرايبه بسلاح أبيض، واتودّى قبل كده لمصحة علشان يتعالج، لكنه رجع تاني لنفس حالته.

وأضاف إن اللي وصل لهم إن الجريمة تمت بسلاح أبيض، وإن بعد ما خلص جريمته حاول يطلع لمرات أبوه، لكنها ما فتحتش له الباب، وده أنقذها.

وتكلم الجد عن الأب وقال إنه كان راجل طيب، وبيهتم بوالدته جدًا، ودايمًا واقف جنبها وبيخدمها، وبيحاول يوفر لابنه كل حاجة.

وفي نهاية كلامه، قال وهو متأثر جدًا:“ده قتل أبوه وستّه اللي ربّته.. مهما كان السبب مفيش حاجة تبرر كده.. إحنا عايزين حقهم.. عايزين العدل”.