والد محمد إبراهيم لـ بصراحة: سعيد بتجديد تعاقد نجلي مع الزمالك

تحدث إبراهيم حسن، والد محمد إبراهيم الظهير الأيمن لنادي الزمالك، عن تجديد تعاقد نجله في ظل المستوى المميز الذي يقدمه بمباريات الزمالك الأخيرة.

والد محمد إبراهيم: مستحيل ينضم لـ الأهلي

وقال والد محمد إبراهيم في تصريحات لموقع بصراحة: « إحنا عيلة زملكاوية للنخاع وأنا زملكاوي جداً. وفيه سر يمكن كتير ميعرفوش، إن "أسامة حسن" نجم الزمالك السابق هو شقيقي وعم محمد، بس محدش عرف المعلومة دي من ساعة ما محمد دخل النادي».

وتابع: « أنا اللي وديته نادي إنبي وهو عنده 8 سنين، قعد سنتين وبعدها النادي استغنى عنه. وقتها محمد قالي "أنا عاوز أروح الزمالك". كلمت أخي أسامة وقولتله رغبة محمد، رد عليا قالي: "أنا ماليش دعوة، لو عاوز يروح يروح، بس ماليش دخل ولا تتوسطلي في حاجة". وفعلاً راح الاختبارات لوحده، ومن أول تمرينة الكابتن حسام عبدالمنعم اختاره، ومن وقتها وهو مكمل في بيته "الزمالك"».

وأضاف: « محمد كان المفروض ياخد الفرصة دي من سنتين فاتوا، سواء مع الفريق الأول أو المنتخب، بس نصيبه والقدر كان ليهم كلمة تانية. اتصاب مرتين في وقت صعب؛ مرة وهو مع منتخب "ميكالي" بيستعدوا لأمم أفريقيا، جاله غضروف في الإسماعيلية ومكملش، وبعد ما اتصعد للزمالك جاتله إصابة تانية عطلته. بس الحمد لله، تدابير ربنا كلها خير».

والد محمد إبراهيم: لم نضع أي شروط مقابل التجديد لـ الزمالك

وواصل: « محمد جدد من حوالي 3 أسابيع، ومطلبناش مليم زيادة ولا حطينا شروط. كل اللي حصل إنه قالي "يا بابا أنا رايح أجدد"، قولتله "على بركة الله يا بني وتوكل على الله". راح لوحده ومضى، وربنا يديمها نعمة وياخد فرصته كاملة».

وأردف: « إحنا عيلة مستورة، أنا راجل موظف ومكفي بيتي، والكلام اللي طلع إن محمد كان شغال بره الكورة عشان يساعد في المصاريف ده "إشاعة" وكلام عارٍ تماماً من الصحة، ومعرفش مين اللي بيألف القصص دي».

وعن تجربة زيزو قال والد محمد إبراهيم: « موضوع زيزو كان قصة تانية خالص وعشت تفاصيلها مع أسامة، والولد وقتها كان بيحلف إنه ممضاش في حتة تانية وطلع ماضي.. دي قصة مش قصتنا. اللي أقدر أضمنهولك إن محمد "دمه أبيض" زملكاوي بجد، ومستحيل يكرر المواقف دي».

وتابع: « بصراحة كان نفسي الكابتن حسام حسن يضمه في المعسكر الأخير، عشان يبقى أصغر لاعب يمثل مصر في كأس العالم، دي كانت تفرق معايا ومعاه جداً، بس لسه الأمل موجود وكل شيء بأوان».

واختتم: « عيني دمعت من الفرحة لما شوفت فيديو هتافات جمهور الزمالك لإبني حسيت إن الزمن بيعيد نفسه، لأني عشت نفس اللحظة مع أخويا أسامة. أنا اللي خدت أسامة وهو عنده 10 سنين وديته الأهلي وبعدين إنبي وبعدين الزمالك. كل غلطة أو عقبة وقع فيها أسامة، بحاول أصلحها مع محمد وبنبهه دايماً عشان يتعلم من اللي فات».