والد المطربة بوسي: بنتى قالتلي انسى إن ليك بنت ومحدش بيساعدني ولادي كلهم قاسيين

قال محمد شعبان والد المطربة بوسى: إن المنزل الذى يسكن فيه منزل زوجته غير أدمى بالمرة، وبعد أن ماتت زوجته قال له ابنه أن يعيش فى هذه الشقة والتى يكون إيجارها بسيط بحيث يستطيع أن يدفع قيمته، وهو يُقيم فيها منذ 4 سنوات، ويقوم على خدمة نفسه.

وأكد والد بوسي، في تصريحات صحفية، أنه يُعانى من أمراض مختلفة بالصدر، ويتناول الكثير من الأدوية حتى يستطيع أن يتنفس بصورة طبيعية.

وتابع أن ابنته انقطعت عنه منذ 5 سنوات «فى الأول لما كان ابنى شغال معاها كانت بتبعتلى فلوس، وبعدين منعت الفلوس اللى كانت بتبعتها، وكمان كرشت أخوها اللى كان بيشتغل عندها سواق وهو صاحب عيال، وعلى فكرة أنا ساكن بالدور الخامس ومن الصعب عليا طلوع ونزول السلم، وأنا على طول بنزل أجيب فول وطعمية لنفسى، وكمان فى ناس كتير بتساعدنى أجيب العلاج»,

وأكمل: «أنا مفيش حد من ولادى بيساعدنى، وبنتى بوسى أخر مرة سألت عليا لما كُنت بسجل مع قناة بعتتلى 2000 جنيه، واتصلت عليا وقالت بص يا محمد ياريت تنسى إنى ليك بنت إسمها بوسى، وأنا فعلاً نسيت ومن ساعتها انقطعت عنى وكمان عملت بلوك لرقمى ومش عارف أتصل عليها لحد دلوقتى».

وأضاف: «على فكرة أنا لسه بحبها دى بنتى، ويا رب يصلح حالها، وأنا طلقت والدتها وهى لسه صغيرة بس كُنت بصرف عليهم، وأُمها كانت بتاخد نفقة منى علشان كُنت بشتغل وحالتى كويسه، ودلوقتى الناس بتساعدنى وبتبعتلى الأكل وطول شهر رمضان اللى فات كان فى واحد بيعدى عليا ويجبلى فطار، وولادى معملوش زى مهوا عمل».

وزاد: «ولادى كلهم قاسيين زى ما أكون زرعت فى قلوبهم الحقد، ومش بوسى بس اللى غلطانه الكل غلطان محدش بيسأل عليا، بس بوسى معاها فلوس ومش بتسأل ومفيش حد من ولادى بيرن عليا، والناس كلها عارفه بأن كل اللى إشتغلت بيه صرفتوا على ولادى ومعنتش حاجة ليوم زى ده».