باسم يوسف: إسرائيل بتدرب chatgpt عشان يعرض الحقيقة بالشكل اللي ها عايزينه

أكد الإعلامي باسم يوسف عن السوشيال ميديا وخطورتها، خلال حواره مع الإعلامي أحمد سالم في برنامج كلمة أخيرة عبر قناة ON.

كما أضاف الإعلامي باسم يوسف في اللقاء الرابع مع أحمد سالم: "كنت فاكر عصر ما قبل الإنترنت ووجدت أن أكتر حاجة علاقتنا أتأثرت بيها هي علاقتنا بالحقيقة، وخايف الإنترنت يكون نهاية للحقيقة أو على الأقل للي احنا فاكرينه حقيقة".

وواصل باسم يوسف كلامه: "مش زعلان من الـ AI، وفي السوشيال ميديا اتحظرت أكتر من مرة علشان نشرت حاجة أو كلمات معينة، وفى أول حرب بغزة جزء كبير جدا من إنقلاب الناس على إسرائيل كانت الفيديوهات اللي كانت بتنزل على الـ TikTok لأنها مكنش عندها رقابة زي إنستجرام وفيسبوك، لدرجة أن 90% من المحتوى كان لفلسطين والموضوع دا عمل ضجة رهيبة فى أمريكا وإسرائيل".

وأضاف باسم يوسف: "الدنيا قامت على TikTok من أعضاء الكونجرس، وفضلوا يضغطوا على الصين علشان يشتروا التطبيق داخل أمريكا والحجة أن الصين بتلم معلومات شخصية، وكانوا بيستخدموا الخوف علشان يعملوا غطاء للاستحواذ عليه وحبة حبة إبتدوا يسحبوا التطبيق تحت إيديهم، وهناك كمية حظر الآن تحدث للمستخدمين اللي كانوا بيدعموا فلسطين".

وختم باسم يوسف كلامه في هذه الجزئية: "فى الآخر سيطروا على TikTok واحدة واحدة وجعلوا واحدة إسرائيلية مشرفة على المحتوى، والناس ابتدت تلاحظ فيديوهات بتتحظر وبعدها تمت صفقة بيع التطبيق لتاني أغنى رجل وأكبر متبرع في تاريخ جيش الاحتلال الإسرائيلي لاري إريسون، وإيلون ماسك مسخر منصة إكس كدعايا لإسرائيل، وإسرائيل الآن بتدرب ChatGPT علشان ينشر الدعايا الخاصة بيهم، وكل شئ نستخدمه علشان هو أسهل وأفضل يتم استخدامه ضدنا عاجلا أو أجلا".