يان سوروب: شرف لي أن أكون جزء من تاريخ الأهلي.. وأتشابه مع النادي في رغبة تحقيق الفوز دائما

أعرب الدنماركي “يان سوروب” المدير الفني الجديد للنادي الأهلي، عن سعادته بتولي تدريب المارد الأحمر، ومدى قدرته على التعامل مع الضغط الجماهيري، والرغبة في تحقيق الفوز بشكل دائم.

مؤتمر يان سوروب

بدأ يان سوروب حديثه: “شرف ليا أكون جزء من تاريخ النادي العظيم ده، أتيحت ليا من دقايق قليلة مقابلة كابتن الخطيب رئيس الأهلي وأعضاء لجنة الكرة والمسئولين، واللي اتفاجئت إن فيهم لاعبين سابقين وعندهم تاريخ كبير”.

وتابع خلال المؤتمر الصحفي الخاص بتقديمه: “أنا كمان كنت لاعب قديم واتكلمت مع الخطيب بما إننا كنا مهاجمين، واتكلمنا عن مركز الهجوم في الكورة والتاريخ اللي فات، وأنا عارف كتير أوي عن الأهلي وتاريخه ، دايمًا عارف ان الأهلي مفيش قدامه غير هدف واحد وهو الفوز”.

وأضاف: “أنا كمان إتعودت أكون موجود في أندية بتبحث عن الفوز، هبذل قصارى جهدي لتطوير الفريق واللاعبين كأفراد وأحافظ على التاريخ، اللي اتحقق قبل كده وأحقق أمجاد جديدة للنادي”.

وأشار: “هبذل أقصي جهد لتطوير اللاعبين ومتشوق جدا أشوف الفريق اللي هشتغل معاه، وعايز ابدأ شغلي لأني عارف إن عندي ماتش مهم في إفريقيا كمان 8 أيام”.

وذكر عن الضغط الجماهير: “هو ده بالظبط اللي بدور عليه ويبقى عندي هدف واحد بس وهو الفوز، بالنسبالي تحقيق الألقاب والفوز هو المعنى الحقيقي لكرة القدم وأنا جيت هنا عشان كده، عارف إنها مهمة صعبة لكن أنا متعود، أنا جاي عشان أحقق الفوز للنادي الأهلي”.

يان سوروب المدير الفني الجديد للأهلي

وواصل: “الأهلي عمل مجهود عظيم في كأس العالم للأندية، ممكن ميكونوش حققوا النتيجة اللي عايزينها بس أنا موجود دلوقتي عشان اساعدهم يعملوا اللي كانوا نفسهم يعملوه في كأس العالم للأندية، إن شاء الله أنا المسئول عن تحقيق الإنجازات بعد كده، وأحقق كل حاجة متحققتش قبل ما أجي”.

وصرح: “كان عندي عروض كتير في الفترة اللي فاتت، لما تكون مدرب في الدوري الألماني أكيد هيجيلك عروض كتير من أنحاء العالم، وحققت نتايج كويسة مع الفرق اللي اشتغلت معاها، لكن لأول مرة من عدة أسابيع أسمع عن اهتمام الأهلي بالتعاقد معايا”. 

وأكمل: “لازم أعترف إن ده كان شئ خاص جدا ومهم جدا بالنسبالي، نتيجة اللي عرفته عن تاريخ الأهلي، وقلبي قالي من أول ما سمعت العرض ده إن أنا عاوز أسمع أكتر عن عرض الأهلي، وبعد كده كان فيه ناس من الأهلي وصلوا الدنمارك للتفاوض معايا”. 

وأتم: “أنا فخور جدا إن أنا هكون جزء من كيان الأهلي، وأتمنى أحقق نتايج وهكون سعيد بكده، والمهم برضو إن أتعرف على ثقافة جديدة أول مرة أتعامل معاها”.