الدكاتره رفضوا يعالجوني.. الفنانة إنجي عبدالله تكشف تفاصيل إصابتها بورم في جذع المخ

كشفت الفنانة  إنجي عبدالله تفاصيل تعرضها لوعكة صحية، مشيرة إلى أن الأطباء رفضوا معالجتها خارج وداخل مصر.

وقالت إنجي عبدالله في منشور لها عبر حسابها الشخصي فيسبوك: عدى ٦ شهور بحاول اتعالج للمره الثانيه من ورم في جذع المخ وهو مش سرطان ، هو ورم حميد ،لكن موجود في اخطر مكان في المخ، للاسف كل الدكاتره في مصر ؛،،وبره مصر ، اساتذه في مجال الاورام والمخ والأعصاب ، رفضوا يعالجونى لانى اخدت كل جلسات الاشعاع والكيماوي المسموح ليا ،، وللمكان الصعب ده سنه ٢٠١٩ وكنت فاكره خلاص انا تمام ،، لكن للاسف رجعتلى اعراض اسوء بكتييير من زمان انا فقدت الاحساس بالجنب اليمين ،وصعوبة في البلع وكهربا في جسمى. كله لما بعمل اى حركه بسيطه حتى لما بحرك عينى، وفي حاجات تانيه كتير حتى انا رجعت للمستشفى اللي اتعالجت فيه قبل كده ،، بنصيحه من دكتور ، تامر النحاس ،،  اللى هو شخصيا رفض يعالجنى و المستشفى طلبت منى امضى اقرار ، انى مسئوله تماما عن كل اللي ممكن يحصلى لو اتعالجت ، طبعا مشيت من الخوف.

وأضافت: دلوقت انا مع الدكتور الوحيد اللى وافق انه يجرب علاجات خفيفه تلطيفيه لمحاوله تحسين جوده الحياه مع اننظار معجزه انا مش بحاول اتعالج علشان متمسكه بالحياه انا بس تعبانه جدا بقالي كتير وبدعى ربنا بحاجه واحده بس.   

وواصلت: اللهم لا نسألك رد القضاء ولكن نسألك اللطف فيه الشخص اللي واقف جنبي وبيساعدنى  ان اعمل ابسط الحاجات اليوميه اللي خلاص بقت مستحيله انى اعملها لوحدى هى اختى اللي عندها ورم في الرئه والمخ مرحله رابعه.

وأختتمت إنجي عبدالله قائلة: كنت فاكره ان انا اللى هخلى بالي منها انا حالتى بتتاخر كل شويه والمره دى شفت حاجات صعب انى حتى اوصفها انا راضيه بقضاءربنا الصعب اوى اوى ليا ولاختى لكن  الحياه بجد صعبه جدا ومفاجئتها اصعب.