النتائج هتحكم.. أحمد شوبير يكشف مصير الجهاز الفني المؤقت للنادي الأهلي

تحدث الإعلامي أحمد شوبير، عن الجهاز الفني المؤقت للنادي الأهلي، بقيادة عماد النحاس المدير الفني.

تصريحات أحمد شوبير

قال أحمد شوبير: “تم الإعلان عن الجهاز الفني للأهلي، وهو عماد النحاس مدير فني، وليد صلاح الدين مدير للكرة، عادل مصطفى مدرب عام، محمد نجيب مدرب مساعد، أمير عبد الحميد مدرب حراس مرمى، محمد الشيحي مدرب أحمال، وعبد الرحمن عيسى مخطط أحمال”.

وواصل عبر راديو أون: "تعالوا نقرأ ما بين السطور، أنا أحب أوي القراءة اللي بين السطور، على فكرة اللي اخترع المصطلح ده عبقري، السطور بيبقى عليها الحروف والكلمات والجمل، لكن اللي بينه بقى المعنى، اللي هي يقول لك المعنى في بطن الشاعر".

وتابع: “وليد صلاح الدين كان نفسه يبقى مدير كرة في الأهلي، وطالما كان نفسه يبقى عنده خطة في دماغه لازم ينفذها، واختيار وليد جه بعد تفكير كبير جدًا داخل إدارة الأهلي، وبعد ترشيحات كتير، واللي طرح اسمه كان كابتن الخطيب ولجنة التخطيط، وبموافقة كابتن محمد يوسف”.

وأضاف: “هل وليد ليه يد في الجهاز ده، طبعًا اه، عادل مصطفى وجوده فكرة من وليد، وهو من زمان معجب بفكره، راجل هادي، مبيعملش مشاكل، وشاطر في الكورة ودايمًا كلامه مضبوط”.

مصير الجهاز الفني المؤقت للنادي الأهلي

وزاد: “بالنسبة لأمير عبد الحميد، كان مطروح أكتر من اسم لكن استقروا عليه، وأنا عجبني كلامه، بس أتمنى يكون ده آخر كلام علشان داخل على تحدي كبير”.

وصرح: “السؤال هنا هل الجهاز ده ممكن يستمر، الإجابة نعم، أنا بطرح تساؤل مشروع، هل لو النتائج جيدة الجهاز يفضل موجودن معنديش إجابة”.

وأكد: “عماد النحاس مستحيل يمشي دلوقتي، الراجل جدع والسنة اللي فاتت عمل الواجب بزيادة وكان سبب أساسي في الفوز بالدوري”.

وأتم حديثه: "الأهلي عنده لحد يوم 25 نوفمبر هيكون لعب 13 ماتش، يعني نص موسم تقريبًا، وده معناه إن النادي بيجري يجيب مدرب أجنبي محترم".