أمير عيد في ختام مهرجان العلمين: "أنا مش كيس شيبسي.. الفن مش للبيع!"

في واحدة من أكثر لحظات مهرجان العلمين صيف 2025 صدقًا وحرارة، أحيا الفنان أمير عيد حفل ختام المهرجان مساء الجمعة، وسط حضور جماهيري كبير، وقدم أداءً تميز بالتفاعل والمشاعر العميقة، ليس فقط عبر الأغاني، ولكن من خلال كلمات صادقة وجريئة وجهها مباشرة إلى جمهوره.

وخلال حديثه على المسرح، عبّر أمير عيد عن رفضه التام للسطحية والسعي وراء الأرقام، قائلاً: "أنا بعمل الأغاني اللي بحبها، مش علشان أكون جامد أو ترند.. أنا مش كيس شيبسي عشان أبيع أكتر حد. أنا فنان حر، وبغني لجمهور حر عنده أفكار وبيحب يفكر".

وروى أمير موقفاً لافتاً أثناء قدومه من القاهرة إلى الحفل، حيث استوقفه عدد من الجمهور لتحيته، مضيفًا: "حتى لو الحضور النهاردة كان نص العدد أو 10 بس، كنت هعمل نفس الحفلة.. المهم مش العدد، المهم الروح اللي بتدوها.. القيمة مش في الكم، القيمة في المعنى".

وانتقد أمير عيد واقع الحياة المعاصرة الذي وصفه بالمزيف قائلاً: "الناس بتتباهى بالفلوس والعربيات والساعات، لكن أمي قالتلي: عمرك ما هتبقى غني إلا لو عندك حاجة الفلوس مبتشتريهاش".

وأردف: "السوشيال ميديا بتحسسنا إننا مش عايشين، بنشوف ناس عاملة نفسها مبسوطة، بس دول مش ناس حقيقية.. أنتم الحقيقة".

واختتم أمير حديثه برسالة مؤثرة إلى جمهوره، قائلًا: "زمان كنت فاكر إني بغني لوحدي ومحدش هيفهمني، لكن وجودكم النهاردة بيأكدلي إني مش لوحدي، وإن الأغاني دي بتعيش بيكم.. أنتم السبب إني مش لوحدي في عالم بقى دمه تقيل ومش حقيقي".