يوسف رأفت يتذكر والده بكلمات مؤثرة: كنت مخبي وجعي قدام عمرو سعد

تذكر الفنان الشاب يوسف رأفت والده الراحل بكلمات مؤثرة، بعد انتهاء مسلسل سيد الناس الذي شارك مع النجم عمرو سعد به في ماراثون رمضان 2025.

وكتب يوسف رأفت عبر “انستجرام”: في لحظات في الحياة، الزمن بيتلاشى، والماضي والحاضر بيتلاقوا في نقطة واحدة.. لحظة من المشاعر الخام، بدون تمثيل، بدون تصنع. لحظة كنت فيها ابن قبل ما أكون ممثل.

وأضاف: طول ما كنت واقف قدام أستاذ عمرو سعد في مشاهدي معاه، مكنتش شايفه.. كنت شايف أبويا. الملامح، الهيبة، النظرة اللي فيها ألف معنى.. كل تفصيلة فيه كانت بتفكرني بالراجل اللي علمني يعني إيه تكون قوي بس قلبك مليان حب، يعني إيه تخبي وجعك عشان محدش يحس بيه.

وواصل: مكنتش عايز أقول لحد وقت التصوير، كنت عايز أعيش الإحساس لوحدي.. كنت عايز أفضل متمسك باللحظة اللي حسيت فيها إن أبويا موجود تاني، حتى لو لدقايق معدودة.

وأردف: بعد ما خلصنا، فضلت التجربة مأثرة فيا.. على قد ما كانت مؤذية، على قد ما خلتني أحس إني محظوظ.. محظوظ إني كنت ابن الراجل ده، ومحظوظ إن الفن قدر يخليني أقرب منه ولو حتى في خيال المشهد.

وأختتم يوسف رأفت قائلًا: يمكن اللي يفرق بين الحقيقة والتمثيل هو النية.. وأنا في كل مشهد، مكنتش بمثل.. كنت بودّع وأحتضن ذكرى في نفس الوقت.