مراد مكرم يكشف سبب رفضه لعمليات التكميم:"مش مضطر"

كشف الفنان مراد مكرم، كواليس فقدان وزنه وذلك من خلال لقاء له ببرنامج "صاحبة السعادة" مع الإعلامية إسعاد يونس على شاشة تلفزيون قناة دي إم سي.

وقال مراد مكرم:"جسمي كان حلو لحد قبل الجواز بـ 3 سنين، وزدت شوية بعد الجواز، ومراتي عيلتها كبيرة واتعزمنا كتير، ومع أكل ماما لقيت نفسي ضربت جامد، لكن برنامج الأكيل زودني 8 أو 10 كيلو، وابتديت أدخل في مشاكل صحية، ومكنتش عارف ألعب مع ابني في طفولته، وخدت وقت علشان أخرج من الدايرة المفرغة، وإني أطلع كل عاطفتي في الأكل سواء متضايق أو محبط أو أكافئ نفسي بالأكل، وجت فكرة الرجوع للجيم".

واضاف مراد مكرم: أنا في الرياضة من 4 أو 5 شهور، لكن بدأت أخس قبلها ونزلت 10 كيلو لأسباب مرضية وحقن من آثارها الجانبية إني إخس، ولما رجعت أتمرن ومع بعض نصائح المدرب في الأكل نزلت 14 كيلو، أنا كنت وصلت لـ 158 كيلو في 20 سنة، لما أخس في سنة أو سنة ونص مش معضلة ومش مستعجل، ولو نزلت لـ 100 كيلو بالعملية شكلي هيكبر 20 سنة، وقبل ما أخس كنت افتح التلاجة وأكلمها وباكل كتير منها.. خاصة وانا زعلان.. دلوقتي بقينا غرباء.