« خسرت أغلى حد في حياتي».. زوجة المنتج تامر فتحي توجه رسالة مؤثرة حزنًا على فراقه

وجهت دينا مختار أرملة المنتج الفني تامر فتحي، الذي رحل عن عالمنا منذ 5 شهور، رسالة مؤثرة حزنًا على فراقه.

وكتبت دينا مختار، عبر حسابها بموقع «فيس بوك»: «مع نهاية هذا العام أقدر أقول كل مخاوفي اللي كنت بخاف منها تحققت ومبقاش عندي حاجه تانية أخسرها لأني خسرت أكبر وأعز وأغلى حد في حياتي. حقيقي مش قادرة أستوعب لحد دلوقتي عدم وجودك وسطنا. خمس شهور عدوا من غيرك كأنهم خمسين سنة، مازال عندي نفس الوجع والألم مش بيخف. ساعات ربنا بيهديني لحظات إنك مسافر أو في الشغل وراجع وآخر اليوم بكتشف انك مش راجع. مش بتيجي مش عارفة هتخطى ده امتى وازاي إلا برحمة ولطف ربنا بي».

وأضافت: «عزايا الوحيد انك بجد معايا ف كل حاجة بشوفك ف أحلامي بتيجي تطمني عليك وتضحكلي زي ما كنت بتضحكلي ع طول. مش قادرة أنسى آخر يوم بينا وانت هادي وبتضحك ونظراتك لي مش قادرة اتخطاها، وده كان اخر يوم لي حلو ف الدنيا دي. كل حاجة اتغيرت بعدك بس بحاول أبقى كويسة عشان انت تبقى متطمن ومرتاح عشان دايما كنت تقولي انت طول مانت كويسة كل حاجة بتبقى كويسة».

وتابعت زوجة المنتج الفني تامر فتحي: «وحشتني أوي أوي وكل منايا وطلبي من ربنا انه يجمعني بيك ف جنات النعيم يا أغلى حاجة حصلت ف حياتي كلها. رحمة الله عليك يا حبيبي يا ونسي ف الدنيا اللي انتهى. غفر الله لك وجعل قبرك روضة من رياض الجنة يا رب».