بعد منى فاروق.. إدوارد يعلن إصـابته بشــلل بالمعدة

أعلن الفنان إدوارد إصابته بـ شلل مؤقت في المعدة، ذلك بعد تلقيه حقن للتخسيس، وتحدث عن تجربته معها ووجه مجموعة من النصائح للجمهور، مشيرا، أنها كانت فى البداية ساعدته فى إنقاص 15 كليو من وزنه.

وكتب إدوارد ستوري، عبر حسابه الشخصي بموقع إنستجرام، قال فيها:"كلام مهم جدًا، أنا كنت باخد حقن التخسيس تحت إشراف دكتور تغذية، ونزلت حوالي 15 كيلو، كنت باخد حقن الساكسنده ودي الدكتورة نصحتني بيها، بس مشكلتها بتتاخد كل يوم في المعدة، وميزيتها إننا نقدر نتحكم في الجرعات عشان ما نتعبش، ووصلت الوزن اللي أنا عايزه".

وأضاف إدوارد: دخلنا في مرحلة التثبيت الدكتورة طلبت مني أروح لدكتور جهاز هضمي أعمل تحاليل، ونطمن بس أنا طنشت وقولتلها أنا هاخد حقن أسبوعية بدل اليومية، عشان تعبت من كل يوم حقنة، وفي ناس نصحوني بالتروليستك لأنها أسبوعية، ومش قوية زي المونجارو، وفضلت آخد التروليستك لمده 5 أسابيع كل أسبوع حقنة، وكانت تمام معايا وكانت برده دكتورة التغذية بتسألني على التحاليل كل فترة وكنت بطنش، لأني تمام مش حاسس بحاجة، وكمان لا كنت بتخن ولا بخس وباكل عادي طبعا.

تابع : بردوا مواظب على دايت مع الدكتورة لحد الأسبوع اللي فات، فجأة مش جعان خالص وقعدت حوالي 4 أيام مش بدخل حمام ولا قادر آكل ووجع في معدتي جامد دكتورة التغذية قالتلي وقف الحقن وروح لدكتور جهاز هضمي فورا، وعملت كده روحت لدكتور قالي حصلي شلل مؤقت من الحقن في المعدة، وكان مفروض تتابع معايا مع دكتورة التغذية، أنا اللي كنت بطنش عشان كنت تمام قالي الحقن مش وحشة ومفعولها كويس.

واستكمل: أنا بنصح أقصاها 3 شهور، بس تاخدها وتوقف فترة وارجع تاني بس لازم طبعا بردوا متابعة مع دكتور تغذية من غير ما اطول عليكم أنا بقالي أسبوع بتعالج، وعملت كل التحاليل حتى صبغة على الكلى، والحمد الله معنديش غير زيادة أملاح، زي كل المصريين بطني بتتحسن واحدة واحدة، ولسه المعدة وجعاني، والدكتور قالي 9 أيام ترجع عادي وإن شاء الله هبقى كويس.

أختتم إدوارد حديثه:أنا حكتلكم تجربتي عشان بقولكم إن الحقن مش وحشة وجابت نتیجة هایلة معايا، بس لازم مع دكتور التغذية، دكتور جهاز هضمي، وكمان دكتور قلب لو أمكن، عشان سرعة ضربات القلب أتمنى أكون قدمت لكم معلومات كويسة عن تجربتي وربنا يشفي أي حد تعبان وأشوفكم دايما كويسين.