خاص| أشرف السعد لموقع «بصراحة»: حب الناس نعمة ومش بفكر أنزل أي انتخابات.. مش هستثمر في مصر غير للعمل الخيري.. هبدأ بعد العيد إجراءات تحصيل أموالي وممتلكاتي

قال رجل الأعمال أشرف السعد، إنه تفاجئ باستقبال أهل قريته ميت غريطة مركز السنبلاوين، بـ «المزمار» والاحتفالات وسط فرحة عارمة من الجميع، موضحا أن حب الناس نعمة لا تقدر بثمن وهي شعبية صاحبته منذ 30 عاما وحتى الآن، «وقالولي أنت ممكن تنزل الانتخابات وتنجح بس أنا عمري ما فكرت فيها».

وأضاف السعد، في تصريحات خاصة لموقع «بصراحة»، أنه لا يزال ليس لديه مخطط بشأن الاستثمار في مصر من عدمه، قائلا «أنا مش جاي عشان أكسب فلوس من مصر، أنا جاي أشوف بلدي وأنا تحت أمر بلدي في أي حاجة وفي خدمتها حتى لو هرجع عسكري تاني في القوات المسلحة أقف على الحدود عشان أدافع عن بلدي ضد الإرهاب».

وتابع السعد، «أنا عودتي لمصر لم تكن مخططة ومكنش في دماغي هعمل إيه بعد كدة، أنا كنت عايز أرجع أشوف بلدي فعلا وناسي اللي وحشني وغبت عنهم بالسنين والسؤال الحقيقي اللي كان بيجي في بالي هو أنا مرجعتش من بدري ليه»، موضحا أن أي استثمارات قد يشارك بها شرط أساسي أن تكون لخدمة مصر والمصريين وقد تأخذ المنحنى الخدمي والخيري أكثر من الاستثماري.

وأوضح السعد، أنه لديه أموال ومقتنيات وأراضي تم التلاعب بها وقت غيابه، وهو يستعد من خلال فريقه القانوني وبالمستندات الخاصة بأملاكه وحصر لثراوته في مصر من استعادة حقوقه، من خلال القانون، مضيفا «أنا ليا فلوس وودائع في بنوك وأراضي من 26 سنة مش عارف أحوالها بقت إيه دلوقتي وهدور على حقي بالقانون لإن أوراق كل حاجة معايا».

وأشار رجل الأعمال، إلى أنه ينوي قضاء بعض الوقت وسط أهالي قريته وأقاربه في ميت غريطة مركز السنبلاوين محافظة الدقهلية، مضيفا «أنا هصلي العيد بإذن الله وسط أهلي وناسي في مسجد ميت خريطة»